بھارتی پروپیگنڈا مشینری اپنی پراکسی فتنہ الخوارج کی سپورٹ میں کھل کر سامنے آگئی

بھارت کی پروپیگنڈا مشینری ایک بار پھر پاکستان کے خلاف سرگرم ہو گئی ہے۔

اطلاعات کے مطابق بھارتی اور افغان سوشل میڈیا اکاؤنٹس خطے میں عدم استحکام پیدا کرنے اور دہشت گرد تنظیم فتنہ الخوارج (ٹی ٹی پی) کے بیانیے کو فروغ دینے میں مصروف ہیں۔

ذرائع کے مطابق ان اکاؤنٹس کی جانب سے پاکستان کی سیکیورٹی فورسز کے خلاف جھوٹا اور من گھڑت پروپیگنڈا پھیلایا جا رہا ہے۔ یہ اکاؤنٹس اوسینٹ ٹی وی نامی ٹی ٹی پی کے میڈیا وِنگ کا حوالہ دیتے ہوئے جھوٹے دعوے کر رہے ہیں کہ پاکستانی فوج کے کچھ جوانوں نے طالبان میں شمولیت اختیار کی ہے۔

تاہم سیکیورٹی ذرائع کے مطابق یہ دعویٰ بالکل بے بنیاد اور جھوٹا ہے۔ پاکستانی فوج میں اس نوعیت کا کوئی واقعہ پیش نہیں آیا اور نہ ہی کسی سطح پر اس کی کوئی رپورٹ موجود ہے۔

تجزیہ کاروں کے مطابق یہ پروپیگنڈا مہم ہندوستانی اور افغان نیٹ ورکس کی جانب سے منظم انداز میں چلائی جا رہی ہے، جس کا مقصد پاکستان کے عوام میں بداعتمادی پھیلانا اور فوج کے خلاف نفرت پیدا کرنا ہے۔

پاکستانی حکام کا کہنا ہے کہ یہ تمام سرگرمیاں مودی حکومت کی پشت پناہی سے چلائی جا رہی ہیں، تاکہ خطے میں امن کو نقصان پہنچایا جا سکے۔ ذرائع کا کہنا ہے کہ بھارتی پروپیگنڈا مشینری پاکستان کے خلاف نفرت انگیز مہم میں مصروف ہے جو ایک مربوط ڈس انفارمیشن آپریشن کا حصہ ہے۔

پاکستانی اداروں نے ایسے جھوٹے پروپیگنڈے کے مقابلے کے لیے ڈیجیٹل مانیٹرنگ اور فیکٹ چیکنگ کو مزید مضبوط کرنے کا عزم ظاہر کیا ہے۔