سعودی عرب میں ملازمت کرنے والوں کیلئے بڑی خبر آگئی

سعودی عرب نے نجی شعبے میں ملازمت کے معاہدوں کے لیے ایک نیا ڈیجیٹل نظام متعارف کرایا ہے۔

نئے ڈیجیٹل نظام کے تحت اب ہر روزگار کا معاہدہ دو سرکاری پلیٹ فارمز پر رجسٹر اور تصدیق کرنا ضروری ہوگا۔ یہ پلیٹ فارمز قویٰ (Qiwa) اور نجز (Najiz) ہیں۔

پہلے صرف قویٰ پر رجسٹریشن ضروری تھی، لیکن نئے نظام میں معاہدہ خود بخود وزارتِ انصاف کے پلیٹ فارم نجز پر بھی تصدیق ہو جاتا ہے۔ اس سے معاہدہ قانونی طور پر نافذ العمل بن جاتا ہے۔ یہ تبدیلی سعودی عرب کے لیبر قوانین میں ایک اہم پیش رفت ہے۔

نئے نظام کی سب سے بڑی خصوصیت تنخواہوں کی تاخیر پر فوری کارروائی ہے۔ اگر آجر کی طرف سے ملازم کی تنخواہ 30 دن سے زیادہ دیر سے ادا کی جائے، تو ملازم نجز پلیٹ فارم کے ذریعے معاہدہ کی نفاذ کی درخواست دے سکتا ہے۔ اس عمل میں مزدور کو عدالت یا کسی طویل شکایتی عمل سے گزرنا ضروری نہیں ہوتا۔ اس سے ملازمین کو تیز اور آسان انصاف ملے گا۔

نئے ضوابط کے تحت معاہدوں میں کچھ خاص معلومات شامل کرنا ضروری ہے، جیسے کہ آجر اور ملازم کا قومی پتہ، تنخواہ کی ادائیگی کی تاریخ، کنٹریکٹ کی نوعیت (مدت والا یا غیر معینہ مدت) اور ملازمت کی تفصیل۔ اس کے علاوہ اگر کسی کمپنی نے غلط یا نامکمل معلومات فراہم کی، تو اسے جرمانہ یا ورک پرمٹ معطلی کا سامنا ہو سکتا ہے۔

یہ اصلاحات سعودی عرب کے کفالت نظام کے خاتمے کے بعد کی گئی ہیں، جس کے تحت غیر ملکی ملازمین اب آجر کی اجازت کے بغیر ملازمت تبدیل کر سکتے ہیں اور بیرون ملک سفر کر سکتے ہیں۔ سعودی حکومت کی یہ جدید اصلاحات عالمی معیار کے مطابق لیبر سسٹم کی طرف ایک اہم قدم ہیں۔