ٹرمپ کا چین پر عائد ٹیرف میں 10 فیصد کمی کا اعلان

بوسان: امریکی صدر ڈونلڈ ٹرمپ نے چین پر عائد ٹیرف کو 10 فیصد کم کردیا ہے۔

 امریکی صدر ڈونلڈ ٹرمپ اور چینی صدر شی جن پنگ کی جنوبی کوریا کے شہر بوسان میں ملاقات ہوئی جس میں دوطرفہ تعلقات پر تفصیلی تبادلہ خیال ہوا۔

اس موقع پر ٹرمپ نے کہا کہ آپ سے دوبارہ مل کر خوشی ہوئی، امریکا اور چین کے درمیان پہلے ہی کئی معاملات پر اتفاق ہو چکا ہے، مزید کچھ امور پر آج پیش رفت متوقع ہے۔

چینی صدر شی جن پنگ کا کہنا تھا کہ چین اور امریکا کو ایک دوسرے کا دوست ہونا چاہیے، دونوں ملکوں کی تجارتی ٹیموں میں بنیادی نکات پر اتفاق رائے ہوچکا ہے۔

شی جن پنگ نے مزید کہا کہ دونوں ممالک کی ترقی کے لیے سازگار ماحول قائم کیا جائے، باہمی مفاد کے مسائل پر کھلے دل سے گفتگو ضروری ہے۔

چینی صدر نے حالیہ غزہ جنگ بندی میں امریکی کردار کو بھی سراہا۔

امریکی صدر ڈونلڈ ٹرمپ نے کہا کہ چین پر عائد ٹیرف کو 57 سے کم ہو کر47 فیصد کردیا گیا ہے جو فوری طور پر نافذ العمل ہوگا۔

ان کا کہنا تھا کہ چینی صدر کے ساتھ ملاقات بہت اچھی رہی، صدر شی سے ملاقات میں بہت سارے فیصلے کیے گئے۔

ڈونلڈ ٹرمپ نے کہا کہ سویابین کی خریداری فوری طور پر شروع ہوجائے گی اور نایاب معدنیات کے معاملات میں مزید رکاوٹیں نہیں ہیں۔

انہوں نے کہا کہ آئندہ سال اپریل میں چین کا دورہ کروں گا اور میرے دورہ چین کے بعد چینی صدر امریکا آئیں گے۔

امریکی صدر کا کہنا تھا کہ ہم چینی صدر کے ساتھ یوکرین معاملے پر مل کر کام کرنے جارہے ہیں جبکہ تائیوان کے معاملے پر بات چیت نہیں ہوئی۔

انہوں نے مزید کہا کہ دیگرممالک ایٹمی تجربے کررہے ہیں تو امریکا کے لیے بھی مناسب ہے کہ یہ تجربے بحال کرے اور اس کے لیے نیوکلیئر ٹیسٹنگ سائٹس کا تعین بعد میں کیا جائے گا۔