بھارتی پائلٹ شیوانگی سنگھ کہاں ہے؟ تصویر سامنے آگئی

پاکستان اور بھارت کے درمیان رواں برس مئی میں ہونے والے فضائی تنازعے کے بعد سے لاپتہ رہنے والی بھارتی رافیل پائلٹ شیوانگی سنگھ بالآخر منظرِ عام پر آگئیں، انہیں ریاست ہریانہ کے امبالہ ایئر فیلڈ پر بھارتی صدر دروپدی مرمو کے ساتھ دیکھا گیا۔

بھارتی میڈیا کے مطابق صدر دروپدی مرمو نے امبالہ ایئر فیلڈ کا دورہ کیا، جہاں انہوں نے رافیل طیارے میں پرواز کا تجربہ کیا۔

صدر کے آفیشل ایکس (سابق ٹوئٹر) اکاؤنٹ سے اس دورے کی تصاویر جاری کی گئیں، جن میں ایک تصویر میں شیوانگی سنگھ بھی ان کے ساتھ موجود نظر آئیں۔

یاد رہے کہ مئی کے تنازعے میں پاکستان نے بھارت کے تین رافیل سمیت 7 طیارے مار گرائے تھے، جس کے بعد شیوانگی سنگھ منظر سے غائب ہوگئی تھیں، وہ بھارت کی پہلی خاتون رافیل پائلٹ ہونے کے باعث خاصی توجہ کا مرکز بنی تھیں۔

ان کی گمشدگی کے دوران سوشل میڈیا پر مختلف قیاس آرائیاں گردش کرتی رہیں ، کچھ حلقوں نے دعویٰ کیا کہ وہ رافیل حادثے میں ہلاک ہوئیں، جبکہ دیگر کا کہنا تھا کہ انہیں پاکستان نے گرفتار کر لیا ہے۔

تاہم پاکستان اور بھارت، دونوں حکومتوں کی جانب سے اس معاملے پر کوئی باضابطہ بیان سامنے نہیں آیا۔

اب ساڑھے پانچ ماہ بعد ان کی نئی تصاویر سامنے آنے سے شیوانگی سنگھ کی گمشدگی کے حوالے سے کئی سوالات دوبارہ اٹھ کھڑے ہوئے ہیں کہ وہ اس دوران کہاں تھیں اور کن حالات میں واپس سامنے آئیں۔