بیرون ممالک سکھوں کو نشانہ بنانے کیلئے "را” کے مجرمانہ نیٹ ورکس کا ایک اور وار

بھارتی خفیہ ایجنسی "را” کے بیرون ممالک سرگرم مجرمانہ نیٹ ورکس کا ایک اور بھیانک منصوبہ بے نقاب ہوگیا۔

کینیڈا میں معروف سکھ رہنما اور بین الاقوامی کمپنی "کینم انٹرنیشنل” کے صدر درشن سنگھ سہسی کو فائرنگ کر کے قتل کر دیا گیا۔

ذرائع کے مطابق فائرنگ کا واقعہ کینیڈا کے شہر میں پیش آیا، جب نامعلوم حملہ آوروں نے درشن سنگھ سہسی کو نشانہ بنایا۔ ابتدائی فوٹیج اور تحقیقات میں یہ ہوشربا انکشاف سامنے آیا ہے کہ اس قتل میں بھارتی خفیہ ایجنسی "را” کے اہلکار ملوث ہیں۔

تحقیقات سے وابستہ حکام کا کہنا ہے کہ حملے میں وینکوور میں بھارتی قونصل خانے کے عملے کے ملوث ہونے کے شواہد بھی ملے ہیں، جس سے اس گھناؤنی کارروائی کے ریاستی سرپرستی میں ہونے کا واضح عندیہ ملتا ہے۔

بین الاقوامی تحقیقاتی رپورٹ کے مطابق، بھارتی خفیہ ایجنسی "را” بیرونِ ممالک علیحدگی پسند سکھ رہنماؤں کو قتل کرنے کے لیے ایک منظم نیٹ ورک چلا رہی ہے۔ یہ نیٹ ورک بھارت کے اندر سے لے کر شمالی امریکہ، یورپ اور آسٹریلیا تک سرگرم ہے۔

رپورٹ میں کہا گیا کہ درشن سنگھ سہسی کا قتل "را” کی سفارتی سرپرستی کے ساتھ ہونے والی کارروائیوں کا ناقابلِ تردید ثبوت ہے، جس نے کینیڈا کی قومی سلامتی کے لیے سنگین خطرات پیدا کر دیے ہیں۔

واقعے کے بعد علیحدگی پسند تنظیم "سکھ فار جسٹس” نے درشن سنگھ سہسی کے قتل کے خلاف کینیڈا بھر میں ملک گیر احتجاج کا اعلان کیا ہے، تنظیم نے الزام عائد کیا ہے کہ بھارتی خفیہ ایجنسی "را” بھارتی قونصل خانوں کے ساتھ ملی بھگت سے بیرون ملک سکھ رہنماؤں کو نشانہ بنا رہی ہے۔

سکھ فار جسٹس کے مطابق مودی حکومت ریاستی سرپرستی میں سکھوں کے خلاف دہشت گردی کو بطور پالیسی استعمال کر رہی ہے، جبکہ عالمی سطح پر اس کے مذموم عزائم اب کھل کر دنیا کے سامنے آ چکے ہیں۔