پاکستان سے متعلق بھارتی میڈیا کا ایک اور جھوٹا پروپیگنڈا بے نقاب

اسلام آباد: پاکستان کی وزارتِ اطلاعات و نشریات نے بھارتی میڈیا کے ایک اور گمراہ کن اور بے بنیاد دعوے کی سختی سے تردید کرتے ہوئے کہا ہے کہ بھارتی چینل ریپبلک ٹی وی کا پروپیگنڈا مکمل طور پر جھوٹ پر مبنی ہے۔

بھارتی چینل نے دعویٰ کیا تھا کہ پاکستان مغربی ممالک اور اسرائیل کی نگرانی میں 20 ہزار فوجی غزہ بھیجنے کی تیاری کر رہا ہے اور پاکستانی پاسپورٹ سے "اسرائیل کے لیے ناقابلِ استعمال” کی شق ختم کر دی گئی ہے۔

وزارتِ اطلاعات و نشریات اور وزارتِ خارجہ پاکستان نے اس دعوے کو من گھڑت، بے بنیاد اور مضحکہ خیز قرار دیتے ہوئے واضح کیا کہ پاکستان کا اسرائیل سے متعلق مؤقف دو ٹوک اور غیر متزلزل ہے۔

ڈائریکٹوریٹ جنرل آف امیگریشن اینڈ پاسپورٹس کے مطابق پاکستانی پاسپورٹ پر اب بھی واضح طور پر درج ہے کہ یہ پاسپورٹ اسرائیل کے علاوہ تمام ممالک کے لیے قابلِ استعمال ہے۔

وزارتِ اطلاعات نے کہا کہ پاکستان نے نہ کبھی اسرائیل کو تسلیم کیا ہے اور نہ ہی کسی قسم کے فوجی تعاون یا تعلقات پر غور کیا جا رہا ہے۔

بیان میں مزید کہا گیا کہ پاکستان فلسطینی عوام کے حقِ خود ارادیت کی مکمل حمایت کرتا ہے اور ہمیشہ اصولی مؤقف پر قائم رہے گا۔

وزارت نے واضح کیا کہ ریپبلک ٹی وی کا یہ من گھڑت دعویٰ کسی علاقائی یا بین الاقوامی میڈیا نے رپورٹ نہیں کیا، جو بھارتی “گودی میڈیا” کے پروپیگنڈا کلچر کی ایک اور مثال ہے۔