ایرانی قوم نے کبھی ذلت قبول نہیں کی، امام جمعہ تہران

تہران کے امام جمعہ حجت الاسلام حاج علی اکبری نے کہا ہے کہ ایرانی قوم نے ترقی، وقار اور خود انحصاری کی راہ اپناتے ہوئے کبھی ذلت قبول نہیں کی۔

حاج علی اکبری نے اپنے خطبے میں کہا کہ ایرانی قوم نے کبھی استکبار کے آگے سر نہیں جھکایا اور نہ ہی آئندہ جھکائے گی۔

انہوں نے کہا کہ ایران کا استقلال، عزت اور مزاحمت امام حسینؑ کے مکتب اور اسلامی انقلاب کی تعلیمات کا نتیجہ ہے، جس نے پوری دنیا خصوصاً خطے کی اقوام کو آزادی اور خودمختاری کا شعور دیا ہے۔

ان کا کہنا تھا کہ ایران کی خودمختار شناخت اسلامی انقلاب اور حسینی فکر کی پیداوار ہے، جس نے عالمی استعمار کے مقابلے میں مزاحمت کی ایک مضبوط علامت قائم کر دی ہے، ایرانی قوم نے ترقی، وقار اور خود انحصاری کی راہ اپناتے ہوئے کبھی ذلت قبول نہیں کی۔

تہران کے امام نے امریکی سفارت خانے پر قبضے کو ایک انقلابی اور تاریخی اقدام قرار دیا، جس کے بارے میں امام خمینیؒ نے فرمایا تھا کہ یہ “انقلابِ اول سے بھی بڑا انقلاب” تھا۔ ان کا کہنا تھا کہ اس اقدام نے ایران کے خلاف کئی خطرات اور سازشوں کو کم کر دیا۔

اپنے خطاب میں امام جمعہ نے دفاعِ مقدس اور حالیہ 12 روزہ مزاحمت کا ذکر کرتے ہوئے کہا کہ ایرانی قوم نے وحدت، عسکری طاقت اور میزائل صلاحیت کے ذریعے عالمی استعمار کو پسپا ہونے پر مجبور کیا، جب مزاحمت قومی اتحاد اور ایمان کے ساتھ ہو، تو کامیابی یقینی ہوتی ہے۔

خطبے کے عربی حصے میں حاج علی اکبری نے فلسطینی شہداء، حماس، جہاد اسلامی، حزب اللہ اور دیگر مزاحمتی قوتوں کو خراجِ تحسین پیش کیا۔

انہوں نے کہا کہ یحییٰ السنوار، اسماعیل ہنیہ اور سید حسن نصراللہ جیسے رہنما استقامت کی روشن مثالیں ہیں جنہوں نے مغربی ایشیا میں استکباری سازشوں کو ناکام بنایا۔

امام جمعہ نے نوجوانوں، خاص طور پر طلباء کو مخاطب کرتے ہوئے کہا کہ وہ شہداء غزہ کے حوصلے اور قربانیوں سے سبق لیں، اور اسلامی اقدار و مزاحمت کے راستے پر ثابت قدم رہیں۔

انہوں نے مزید کہا کہ یہی نوجوان نسل مستقبل میں ایران اور خطے کی آزادی و خودمختاری کی ضامن بنے گی۔