کمیونسٹ نیویارک چلائے گا تو وہاں فنڈز بھیجنا پیسوں کا ضیاع ہوگا، ٹرمپ کا ظہران ممدانی پر وار

امریکی صدر ڈونلڈ ٹرمپ نے نیویارک کے میئر کے امیدوار ظہران ممدانی کو شدید تنقید کا نشانہ بناتے ہوئے کہا ہے کہ اگر نیویارک کو کوئی کمیونسٹ چلاتا ہے تو وہاں فنڈز بھیجنا صرف پیسوں کا ضیاع ہوگا۔

صدر ڈونلڈ ٹرمپ نے امریکی ٹی وی کو دیے گئے اپنے ایک انٹرویو میں کہا کہ اگر وہ منتخب ہوئے تو وفاقی حکومت کے لیے نیویارک شہر کو فنڈز فراہم کرنا ناممکن ہو جائے گا۔

انہوں نے ظہران ممدانی کا موازنہ سابق میئر بل ڈی بلاسیو سے کرتے ہوئے کہا کہ بلاسیو ناکام میئر تھا، مگر ممدانی اس سے بھی زیادہ نقصان دہ ثابت ہوں گے۔

انٹرویو کے دوران ٹرمپ نے بالواسطہ طور پر سابق گورنر اینڈریو کومو کی حمایت کا بھی اشارہ دیا۔

ان کا کہنا تھا کہ اگر انتخاب ایک برے ڈیموکریٹ اور ایک کمیونسٹ کے درمیان ہو تو میں برے ڈیموکریٹ کو ترجیح دوں گا۔

واضح رہے کہ نیویارک میئر کے انتخابات آج ہو رہے ہیں جن میں ظہران ممدانی کا مقابلہ اینڈریو کومو اور ری پبلکن امیدوار رٹیس سلوا سے ہے۔

تازہ عوامی سروے کے مطابق ظہران ممدانی 44 فیصد عوامی حمایت کے ساتھ سب سے آگے ہیں، جبکہ کومو کو 33 فیصد اور سلوا کو 14 فیصد مقبولیت حاصل ہے۔

تجزیہ کاروں کے مطابق ظہران ممدانی، جو نیویارک کے پہلے مسلم اور سوشلسٹ قانون ساز کے طور پر نمایاں ہوئے، امریکی سیاست میں ابھرتی ہوئی متحرک اور مزاحمتی آواز سمجھے جاتے ہیں۔ ممدانی نہ صرف فلسطین کے حق میں کھل کر بات کرتے ہیں بلکہ امیگریشن، سماجی انصاف اور امریکی خارجہ پالیسی پر بھی ٹرمپ کے مؤقف کو چیلنج کرتے ہیں۔ وہ نوجوانوں، اقلیتوں اور ترقی پسند طبقات میں تیزی سے مقبول ہو رہے ہیں۔

یہی وجہ ہے کہ ٹرمپ انہیں اپنی سیاست اور بیانیے کے لیے خطرہ سمجھتے ہیں۔ چونکہ ٹرمپ بارہا مسلم مخالف بیانیہ اور سخت امیگریشن پالیسیوں کی وکالت کرتے ہیں، اس لیے ظہران ممدانی جیسے رہنما ان کے لیے ایک ایسی سیاسی قوت بن چکے ہیں جو ان کے نظریات اور مستقبل کے سیاسی منصوبوں کو متاثر کر سکتی ہے۔