ایرانی سپریم لیڈر کا امریکا کو صیہونی حکومت کی حمایت ختم کرنے کا مشورہ

ایران کے سپریم لیڈر آیت اللہ خامنہ ای نے امریکا کو صیہونی حکومت کی حمایت ختم کرنے کا مشورہ دیدیا۔

رہبرِ انقلاب اسلامی آیت اللہ العظمیٰ سید علی خامنہ ای نے یومِ طلبہ اور سامراج کے خلاف جدوجہد کے قومی دن کے موقع پر ایرانی طلبہ، اساتذہ اور جنگ کے شہدا کے اہلِ خانہ سے ملاقات میں امریکا پر سخت تنقید کی اور کہا کہ ایران کے ساتھ تعاون، صیہونی حکومت کی حمایت کے ساتھ ایک ساتھ نہیں چل سکتا۔

انہوں نے کہا کہ امریکا اگر واقعی ایران سے تعلقات بہتر بنانا چاہتا ہے تو پہلے اسرائیل کی پشت پناہی ترک کرے، خطے سے اپنے فوجی اڈے ختم کرے اور مشرقِ وسطیٰ کے معاملات میں مداخلت بند کرے، تاہم یہ سب “نزدیکی مستقبل میں ممکن نظر نہیں آتا۔

آیت اللہ خامنہ ای نے 4 نومبر 1979 کے امریکی سفارتخانے پر قبضے کے تاریخی پس منظر پر بات کرتے ہوئے کہا کہ اس اقدام نے ایران کے دشمنوں کے چہرے بے نقاب کیے اور امریکی سازشوں کی جڑوں کو ظاہر کیا۔

ان کا کہنا تھا کہ یہ قبضہ کوئی حادثاتی واقعہ نہیں تھا بلکہ امریکی مداخلت کے ردعمل کے طور پر سامنے آیا، جب طلبہ کو سفارتخانے سے ایسے شواہد ملے جو انقلاب کے خلاف سازشوں کی تصدیق کرتے تھے۔

رہبرِ انقلاب نے کہا کہ امریکا کی دشمنی نئی نہیں بلکہ 1953 میں مصدق حکومت کے خلاف امریکی و برطانوی سازش سے شروع ہوئی تھی، انقلاب کے بعد سے واشنگٹن نے پابندیوں، پروپیگنڈا، ایران کے دشمنوں کی مالی مدد اور حتیٰ کہ مسافر طیارہ گرا کر بھی ایران کو نقصان پہنچانے کی کوشش کی۔

ایرانی سپریم لیڈر کا کہنا تھا کہ اسلامی جمہوریہ اور امریکا کے درمیان اختلاف کوئی وقتی یا سیاسی مسئلہ نہیں بلکہ فکری اور نظریاتی تصادم ہے۔ امریکا سامراجی فطرت کے باعث ہمیشہ دوسروں پر تسلط چاہتا ہے، جبکہ ایران آزادی اور خودمختاری پر یقین رکھتا ہے۔

انہوں نے کہا کہ “امریکا مردہ باد” کا نعرہ دشمنی کی وجہ نہیں بلکہ اس دشمنی کی علامت ہے جو امریکا نے خود اپنے رویے سے پیدا کی، امریکی قیادت کو یہ گمان ہے کہ ایرانی قوم جھک جائے گی، مگر ایسا کبھی نہیں ہوگا۔

اپنے خطاب کے اختتام پر انہوں نے نوجوانوں کو حضرت فاطمہ الزہراؑ اور حضرت زینبؑ کی سیرت کو اپنانے کی تلقین کی اور کہا کہ طاقتور، باشعور اور متحد قوم ہی دشمن کے عزائم کو ناکام بنا سکتی ہے۔