نیویارک میئر کا الیکشن آج ہوگا، ڈیموکریٹ مسلمان امیدوار ظہران ممدانی سب سے آگے

امریکا کے سب سے بڑے شہر نیویارک میں آج ہونے والے میئر کے انتخاب نے غیر معمولی توجہ حاصل کر لی ہے۔

انتخابی مہم اس وقت زیادہ نمایاں ہوئی جب صدر ڈونلڈ ٹرمپ نے ڈیموکریٹ امیدوار ظہران ممدانی کو “کمیونسٹ” قرار دے کر نیا تنازع کھڑا کر دیا۔

فرانسیسی خبر رساں ادارے اے ایف پی کے مطابق ظہران ممدانی پیدائشی امریکی مسلمان اور ڈیموکریٹک پارٹی کے نمایاں رہنما ہیں جو اس وقت ریاستی اسمبلی میں کوئنز کی نمائندگی کر رہے ہیں۔

تازہ انتخابی سروے میں وہ اپنے حریف سابق گورنر اینڈریو کومو پر واضح برتری حاصل کیے ہوئے ہیں۔

کومو، جن پر جنسی ہراسانی کے الزامات عائد ہو چکے ہیں، ڈیموکریٹک پرائمری میں شکست کے بعد آزاد امیدوار کے طور پر انتخاب لڑ رہے ہیں۔

ریپبلکن پارٹی کے 71 سالہ امیدوار کرٹس سلیوا تیسرے نمبر پر ہیں۔ وہ گارڈین اینجلز نامی رضاکار گروپ کے بانی، معروف ریڈیو ہوسٹ اور بلیوں سے محبت کرنے والے کے طور پر پہچانے جاتے ہیں۔

یونیورسٹی آف کوئنی پیاک کے تازہ سروے (23 سے 27 اکتوبر) کے مطابق، ظہران ممدانی 43 فیصد عوامی حمایت کے ساتھ سب سے آگے ہیں، جب کہ کومو 33 فیصد اور سلیوا 14 فیصد پر موجود ہیں۔

سیاسی ماہرین کے مطابق اگر ممدانی کامیاب ہوتے ہیں تو وہ نیویارک کے پہلے مسلم میئر بن جائیں گے۔

دوسری جانب سابق امریکی صدر باراک اوباما گزشتہ روز مختلف ڈیموکریٹ گورنرز کی انتخابی ریلیوں میں شریک ہوئے اور اپنی پارٹی کے امیدواروں کے لیے حمایت کی اپیل کی۔

اسی دوران اوباما نے نیویارک میئرشپ کے ڈیموکریٹ امیدوار ظہران ممدانی سے بھی فون پر رابطہ کیا اور انہیں اپنی مکمل حمایت کا یقین دلایا۔