دبئی کا ہزاروں نوکریوں کا اعلان؛ اپلائی کرنے کا آسان طریقہ جان لیں

دبئی کے ولی عہد شیخ حمدان بن محمد بن راشد المکتوم نے ایک جامع پالیسی پیکیج کی منظوری دی ہے۔ اس کا مقصد دبئی کو دنیا کے سب سے خوبصورت، قابلِ رہائش اور صحت مند شہروں میں شامل کرنا ہے۔

 یہ منصوبے 2025 کی سالانہ حکومتی میٹنگز میں پیش کیے گئے۔ اس میں شہری سرسبز ماحول، تعلیم، صحت اور روزگار کے مواقع پر خصوصی توجہ دی گئی ہے۔

سبزہ زار اور پارکس:

دبئی میں 800 سے زائد نئے سبز منصوبے شروع کیے جائیں گے۔ ان میں 310 نئے پارکس قائم کرنا اور 322 موجودہ پارکس کی تزئین و مرمت شامل ہے۔ منصوبے کے تحت درختوں کی تعداد تین گنا بڑھانے، 187 مربع کلومیٹر سبزہ زار قائم کرنے اور ری سائیکل پانی کو 100 فیصد آبپاشی کے لیے استعمال کرنے کا ہدف رکھا گیا ہے۔ سال 2040 تک 95 ملین پارک وزٹس کا ہدف ہے اور 80 فیصد آبادی کو پارک تک صرف پانچ منٹ کی دوری پر سہولت فراہم کی جائے گی۔

ہوابازی میں روزگار:

ایوی ایشن ٹیلنٹ 33 پروگرام کے تحت دبئی کو عالمی فضائی مرکز کے طور پر مضبوط کیا جائے گا۔ اس میں 15 ہزار نئی ملازمتیں، 4 ہزار تربیتی مواقع اور 30 سے زائد اسٹریٹجک شراکت داریوں کا اعلان کیا گیا ہے۔ اس منصوبے کا مقصد دبئی کی معیشت کو مضبوط بنانا اور 65 ہزار اماراتی شہریوں کو نجی شعبے میں روزگار دینا ہے۔

سستی تعلیم:

2033 تک دبئی میں 60 نئے سستے اسکول قائم کیے جائیں گے۔ ان اسکولوں میں 1 لاکھ 20 ہزار طلبہ کے لیے نشستیں دستیاب ہوں گی۔ اس کے لیے سرکاری فیسوں میں رعایت اور زمین کے کرایے میں کمی جیسے اقدامات کیے جائیں گے تاکہ نجی سرمایہ کاری کی حوصلہ افزائی ہو۔

عالمی اسپورٹس حب:

اسپورٹس سیکٹر اسٹریٹجک پلان 2033 کے تحت دبئی کو دنیا کا سب سے بڑا اسپورٹس حب بنانے کی منصوبہ بندی ہے۔ اس پروگرام میں 17 مختلف کھیلوں پر مشتمل 19 پروگرامز اور 75 عملی اقدامات شامل ہیں۔ مقصد بین الاقوامی ایونٹس کی میزبانی، کھلاڑیوں کی تربیت اور عوامی شمولیت میں اضافہ ہے۔

مالیاتی استحکام اور عدالت:

نئی فنانشل ری اسٹرکچرنگ اور ان سالوینسی کورٹ کے قیام سے دبئی میں مالیاتی تنظیم نو اور دیوالیہ پن کے معاملات کو موثر طریقے سے حل کیا جائے گا۔ اس سے دبئی دنیا کے تین بڑے مالیاتی مراکز میں شامل ہو سکے گا۔

صحت کے شعبے میں اقدامات:

صحت کے شعبے میں ابتدائی بیماریوں کی تشخیص کے لیے بھی اہم اقدامات کیے گئے ہیں۔ کولون کینسر کی اسکریننگ میں 40 فیصد اضافہ، ویکسینیشن خدمات میں 50 فیصد بہتری اور مریضوں کی تسلی میں 90 فیصد اضافہ کا ہدف مقرر کیا گیا ہے۔ مریضوں کے انتظار کا وقت سات دن سے کم کرنے کی بھی پالیسی شامل ہے۔

یہ تمام منصوبے دبئی کو ایک پائیدار، خوشحال اور صحت مند معاشرے کی طرف لے جانے کے لیے تیار کیے گئے ہیں۔ نوکریوں کے مواقع کے لیے دبئی حکومت کی ویب سائٹ سے مکمل شرائط اور ضوابط حاصل کیے جا سکتے ہیں۔