نیتن یاہو نیویارک آئے تو گرفتار کریں گے، منتخب میئر زہران ممدانی کا دو ٹوک اعلان

نیویارک — امریکہ کی تاریخ میں پہلی بار میئر بننے والے مسلمان رہنما زہران ممدانی نے فلسطینیوں کے لیے مضبوط مؤقف اپناتے ہوئے اسرائیلی وزیراعظم بینجمن نیتن یاہو کی ممکنہ گرفتاری کا اعلان کر دیا۔ انہوں نے کہا کہ اگر نیتن یاہو نیویارک کا رخ کرتے ہیں تو قانونی راستے سے گرفتار کرائیں گے۔

زہران ممدانی نے اپنی انتخابی کامیابی کے بعد گفتگو میں کہا کہ نیویارک انسانی حقوق اور عالمی قانون کی پاسداری کرنے والا شہر ہے اور جنگی جرائم میں مطلوب افراد کے لیے یہاں کوئی رعایت نہیں ہو سکتی۔

ان کا کہنا تھا کہ عالمی عدالتِ انصاف نے نیتن یاہو کے خلاف وارنٹ جاری کیا ہے، لہٰذا اگر وہ شہر میں قدم رکھیں تو قانون اپنا راستہ لے گا۔

یہ بات قابل ذکر ہے کہ عالمی عدالتِ انصاف نے نومبر 2024 میں نیتن یاہو کے خلاف جنگی جرائم اور انسانی حقوق کی خلاف ورزیوں کے الزام میں گرفتاری وارنٹ جاری کیا تھا۔ نیتن یاہو گزشتہ کئی سالوں سے اقوام متحدہ کے اجلاس میں شرکت کے لیے نیویارک آتے رہے ہیں۔ فلسطین میں جاری مظالم کے بعد یہ پہلا موقع ہے کہ کسی منتخب امریکی رہنما نے اس قدر واضح اور سخت مؤقف اختیار کیا ہے۔

انتخابی مہم کے دوران زہران ممدانی نے عوام دوست منصوبے بھی پیش کیے، جن میں مفت بس سروس، کرایوں میں فریز، سرکاری سپر مارکیٹس اور بچوں کی مفت نگہداشت شامل ہیں۔ تاہم ان کا فلسطین کے حق میں کھڑا ہونا اور اسرائیلی قیادت کو جواب دینا دنیا بھر کے مسلمانوں میں خوشی اور حوصلے کا باعث بنا ہے۔

مبصرین کے مطابق زہران ممدانی کی جیت نیویارک میں نئی سیاسی سوچ اور انصاف پر مبنی فیصلوں کا آغاز ہے، جبکہ مسلم کمیونٹی نے بھی ان کے اعلان کو تاریخی قرار دیا ہے۔