نیو یارک میں اسلامو فوبیا کی کوئی گنجائش نہیں، نومنتخب میئر ظہران ممدانی کا تاریخی خطاب

نیو یارک — نیو یارک کے نومنتخب میئر ظہران ممدانی نے اپنی بھرپور اور تاریخی کامیابی کے بعد عوام سے خطاب کرتے ہوئے کہا کہ آج تبدیلی کی بنیاد رکھ دی گئی ہے۔

انہوں نے کہا کہ عوام نے خوف اور نفرت کی سیاست کو مسترد کر دیا ہے اور ایک ایسے مستقبل کے حق میں فیصلہ دیا ہے جو امید، انصاف اور اتحاد پر مبنی ہے۔

تقریب میں ہزاروں لوگ موجود تھے اور فضا ’’امید زندہ ہے‘‘ اور ’’نیا نیو یارک‘‘ جیسے نعروں سے گونجتی رہی۔ ممدانی بار بار عوام کی جانب سے ملنے والے بے مثال اعتماد کا ذکر کرتے ہوئے جذباتی دکھائی دیے۔

انہوں نے کہا، یہ جیت میری نہیں، یہ جیت اُس نوجوان کی ہے جس نے اپنی پڑھائی کے ساتھ گھر چلایا، اُس محنت کش ٹیکسی ڈرائیور کی ہے، اُس مسلمان ماں کی ہے جس نے اپنے بیٹے کو سکھایا کہ ایمان اور ہمت سے زندگی بدلی جاتی ہے۔

ٹرمپ کو براہِ راست چیلنج

تقریر کے دوران ممدانی نے سابق امریکی صدر ڈونلڈ ٹرمپ کو براہِ راست مخاطب کرتے ہوئے کہا کہ ٹرمپ اگر آپ یہ دیکھ رہے ہیں تو آواز اونچی کر دیں۔ آپ نے ہمیں ڈرانا چاہا، مگر آج نیو یارک نے دکھا دیا کہ ہم خوف نہیں کھاتے۔ آپ کسی ایک کو نہیں، پورے شہر کو چیلنج کر رہے ہیں۔ اور اس بار آپ کو پورا شہر جواب دے گا۔

اسی لمحے ہال میں موجود عوام نے زور دار نعرے لگائے اور ممدانی نے کہا کہ ہم اسلاموفوبیا کی سیاست ختم کر دیں گے۔ نیو یارک کسی نفرت بانٹنے والے کا شہر نہیں، یہ تارکین وطن، مسلمانوں، محنت کشوں اور اُن سب کا شہر ہے جنہوں نے اسے بنایا۔

میں مسلمان ہوں اور مجھے فخر ہے

خطاب کے دوران انہوں نے اپنی مذہبی شناخت کو بھی فخر کے ساتھ بیان کیا کہ میں مسلمان ہوں، میں ڈیموکریٹک سوشلسٹ ہوں، اور مجھے فخر ہے۔ میرے ایمان نے مجھے سکھایا کہ ظلم کے خلاف کھڑا ہونا عبادت ہے، مظلوم کے ساتھ کھڑے ہونا فرض ہے۔

نسل پرستی اور تعصب کے خلاف اعلانِ جنگ

ممدانی نے واضح کیا کہ ان کی حکومت ہر طرح کی نفرت، نسل پرستی اور تقسیم کا مقابلہ کرے گی۔ ہمارے بچے خوف کے ساتھ نہیں جئیں گے۔ کوئی شخص مذہب، رنگ، زبان یا نسل کی بنیاد پر نشانہ نہیں بنایا جائے گا۔ اسلاموفوبیا کی اس سرزمین پر ایک انچ جگہ نہیں ہوگی۔

تارکین وطن کی خدمات کا اعتراف

انہوں نے کہا کہ نیو یارک دنیا بھر کے مہاجرین کی محنت سے بنتا ہے۔ ٹرمپ سن لیں، تارکین وطن نے اس شہر کو بنایا، اسے چلایا اور آج بھی یہی لوگ اس کے ستون ہیں۔ یہ شہر ان کا تھا، ہے اور رہے گا۔

والدین اور اہلیہ کا خصوصی ذکر

جیت کے جذباتی لمحے میں انہوں نے اپنے والدین اور اہلیہ کا شکریہ ادا کرتے ہوئے کہا کہ میری کامیابی میرے والدین کی قربانیوں کی مرہونِ منت ہے۔ میری اہلیہ ہر مشکل میں میرے ساتھ کھڑی رہیں۔ آج کا دن ان کے نام ہے۔

ہم نے سیاسی بادشاہت توڑی

انہوں نے اپنے سیاسی مخالف اینڈریو کومو کا نام لیتے ہوئے کہا کہ ہم نے ایک سیاسی سلطنت کو شکست دی۔ اب عوام کی حکومت ہوگی، طاقت عام شہری کے ہاتھ میں ہوگی۔

نیا دور شروع ہو چکا ہے

اختتامی لمحات میں ممدانی نے کہا، یہ صرف جیت نہیں۔ یہ نئی تاریخ کا آغاز ہے۔ ہم نیو یارک کو ایسا شہر بنائیں گے جہاں ہر فرد عزت سے جی سکے، جہاں امید ہماری طاقت ہو، اور جہاں انصاف ہر دروازے تک پہنچے۔ اپنے سر اٹھا کر چلیں، ہم نے ناممکن کو ممکن کر دیا ہے۔