دبئی میں دنیا کی سب سے مہنگی ترین کافی، ایک کپ کی قیمت جان کر آپ کے ہوش اڑجائیں گے

دبئی کے جولیتھ کیفے نے کافی کے شوقین افراد کے لیے ایک نایاب اور مہنگی کافی پیش کی ہے۔

 جولیتھ کیفے کی کافی اس وقت دنیا کی سب سے مہنگی کافی کے اعزاز کی حامل بن گئی ہے۔ اس کافی کے ایک کپ کی قیمت 3600 یو اے ای درہم، تقریباً 2 لاکھ 75 ہزار پاکستانی روپے سے زائد رکھی گئی ہے۔

اس کافی کی تیاری کے لیے پاناما کے آتش فشانی ڈھلوانوں میں اگنے والے Geisha بیجوں کی خاص قسم نیڈو 7 استعمال کی جاتی ہے۔ اس قسم کی کافی کی پیداوار بہت محدود ہوتی ہے، اور ہر فصل سے صرف چند کلو گرام بیج حاصل ہوتے ہیں، جس کی وجہ سے یہ کافی بہت خاص اور نایاب تصور کی جاتی ہے۔

جولیتھ کیفے نے اس کافی کی محدود تعداد صرف 400 کپ کے لیے پیش کرنے کا منصوبہ بنایا ہے۔ کیفے نے 2025 کے آغاز میں 20 کلو گرام خام کافی کی خریداری ریکارڈ بولی کے ذریعے کی تھی، جس میں 549 بولیاں لگائی گئیں۔ سب سے زیادہ قیمت پر یہ کافی فروخت ہوئی۔

کیفے کے مالک Serkan Sagsoz کے مطابق ایک کپ دبئی کے حکمران شیخ محمد بن راشد المکتوم کے لیے مخصوص ہے، اور صرف چند خوش نصیب افراد ہی اس کا ذائقہ چکھ سکیں گے۔ Serkan Sagsoz نے بتایا کہ کافی میں چینبلی، مالٹے اور دیگر پھلوں کے سفوف بھی شامل کیے جاتے ہیں تاکہ ذائقہ اور خوشبو میں نکھار آئے۔

اس سے قبل دنیا کی سب سے مہنگی کافی کا گنیز ورلڈ ریکارڈ دبئی کے ہی نام تھا، جس کا ایک کپ 2500 درہم میں فروخت ہوتا تھا، لیکن جولیتھ کیفے کی یہ نئی پیشکش اس ریکارڈ کو پیچھے چھوڑ گئی ہے۔