میکسیکو کی صدر کلاڈیا شین بام ہراسانی کا شکار، مجمعے میں موجود شخص کی بوسہ لینے کی کوشش

میکسیکو سٹی: میکسیکو کی خاتون صدر کلاڈیا شین بام کو عوامی اجتماع کے دوران ہراسانی کا سامنا کرنا پڑا، جب ایک شخص نے ان سے ملاقات کے موقع پر غیر اخلاقی رویہ اختیار کرتے ہوئے گردن پر بوسہ لینے کی کوشش کی۔
غیر ملکی خبر رساں ادارے کے مطابق یہ واقعہ گزشتہ روز اُس وقت پیش آیا جب صدر کلاڈیا شین بام صدارتی محل کے قریب ایک تقریب میں شرکت کے لیے جا رہی تھیں۔ راستے میں ان کے حامیوں نے ان کا استقبال کیا، وہ مجمعے سے ہاتھ ملا رہی تھیں اور تصاویر بنوا رہی تھیں کہ اچانک ایک شخص پیچھے سے آیا اور انہیں چھوتے ہوئے گردن پر بوسہ لینے کی کوشش کی۔
صدارتی سکیورٹی ٹیم نے فوری طور پر اُس شخص کو پیچھے ہٹا دیا، جس کے بارے میں بعد میں بتایا گیا کہ وہ نشے کی حالت میں تھا۔ واقعے کے باوجود صدر شین بام نے تحمل کا مظاہرہ کیا اور اُس شخص سے مہذب انداز میں بات چیت کی، یہاں تک کہ اس کے ساتھ تصویر بنوانے پر بھی رضامندی ظاہر کی۔ تاہم بعد ازاں سکیورٹی حکام نے اطلاع دی کہ اُس شخص کو گرفتار کرلیا گیا ہے۔
اس واقعے کی ویڈیوز سوشل میڈیا پر وائرل ہوگئی ہیں، جن میں دیکھا جاسکتا ہے کہ صدر شین بام صورتحال کو پرسکون انداز میں سنبھالنے کی کوشش کر رہی ہیں۔
وزارتِ خواتین کی سربراہ نے واقعے پر سخت ردِعمل دیتے ہوئے کہا کہ “ہم آج اپنی صدر کے ساتھ پیش آنے والے اس افسوسناک واقعے کی شدید مذمت کرتے ہیں۔ یہ رویہ ناقابلِ قبول ہے اور خواتین کے احترام کے اصولوں کے منافی ہے۔”
اقوامِ متحدہ کی خواتین سے متعلق ایجنسی(یو این ویمن) کے مطابق میکسیکو میں 15 سال یا اس سے زائد عمر کی تقریباً70 فیصد خواتین اپنی زندگی میں کم از کم ایک بار جنسی ہراسانی کا سامنا کرتی ہیں، جو ملک میں خواتین کے تحفظ کے حوالے سے سنگین صورتحال کو ظاہر کرتا ہے۔