نیویارک کے نئے میئر زہران ممدانی کتنی دولت کے مالک ہیں؟

امریکی صدر ڈونلڈ ٹرمپ اور ٹیکنالوجی ارب پتی ایلون مسک سمیت کئی نامور شخصیات نے زہران ممدانی کی انتخابی مہم کی مخالفت کی تھی، لیکن اس کے باوجود انہوں نے نیویارک کے میئر کے طور پر فتح حاصل کی۔

زہران ممدانی 1991 میں یوگنڈا کے دارالحکومت کمپالا میں پیدا ہوئے، ان کے والد محمود ممدانی ایک بھارتی نژاد اسکالر ہیں جبکہ والدہ میرا نائر ایک مشہور فلمساز ہیں۔ جب ان کی عمر سات سال تھی، ان کا خاندان کولمبیا یونیورسٹی میں اپنے والد کی ملازمت کے باعث نیو یارک منتقل ہوگیا تھا۔

اثاثوں کی مالیت

حال ہی میں جاری ہونے والی فوربز افریقا کی رپورٹ میں زہران ممدانی کی مالی حیثیت کے حوالے سے انکشاف کیا گیا ہے کہ وہ ایک معمولی اثاثوں کے مالک ہیں۔

فوربز کے مطابق ممدانی کی سالانہ تنخواہ نیویارک کے میئر کے طور پر 2 لاکھ 60 ہزار ڈالر ہوگی، اس کے علاوہ، بطور نیویارک ریاستی اسمبلی ممبر، ان کی سالانہ تنخواہ 1 لاکھ 42 ہزار ڈالر ہے۔

زہران ممدانی کا ایک اور منفرد پہلو یہ ہے کہ وہ "مسٹر کارڈیمم” کے نام سے ایک ہپ ہاپ موسیقار بھی ہیں، جس سے انہیں تقریباً 1 ہزار ڈالرز کی میوزک رائلٹیز حاصل ہوتی ہیں۔ وہ اس وقت نیویارک کے علاقے اسٹوریا میں کرائے کے اپارٹمنٹ میں رہتے ہیں جس کا کرایہ ماہانہ 2 ہزار 250 ڈالر ہے۔

ذاتی اثاثے

ممدانی کے اثاثوں میں یوگنڈا کے شہر جنیا میں خریدی گئی 4 ایکڑ اراضی شامل ہے، جس کی مالیت اس وقت 1 لاکھ 50 ہزار سے 2 لاکھ 50 ہزار ڈالر تک ہے۔ تاہم یہ واضح نہیں کہ یہ جائیداد خریدی گئی تھی یا انہیں تحفے میں ملی تھی۔

ان کے والدین نے تعلیم میں نمایاں کامیابیاں حاصل کی ہیں، ان کے والد محمود ممدانی کولمبیا یونیورسٹی میں پروفیسر ہیں اور اب تک 7 کتابیں لکھ چکے ہیں۔ ان کے والد کی سالانہ کمائی تقریباً 2 لاکھ سے 3 لاکھ ڈالر ہو سکتی ہے۔