امن معاہدے کی خلاف ورزیاں: ترکیہ نے نیتن یاہو سمیت اسرائیلی حکام کے وارنٹ گرفتاری جاری کر دیے

انقرہ: ترکیہ نے غزہ میں جاری اسرائیلی کارروائیوں کو انسانیت کے خلاف جرائم قرار دیتے ہوئے اسرائیلی وزیراعظم بینجمن نیتن یاہو، وزیر دفاع یوآو گیلنٹ، نیشنل سیکیورٹی وزیر ایتمار بن گوویر سمیت 37 اعلیٰ اسرائیلی حکام کے خلاف وارنٹ گرفتاری جاری کر دیے۔

الجزیرہ کے مطابق استنبول کے چیف پراسیکیوٹر کے دفتر کی جانب سے جاری بیان میں کہا گیا ہے کہ ان تمام عہدیداروں نے غزہ میں منظم انداز میں شہریوں، طبی عملے اور بچوں کو نشانہ بنا کر نسل کشی کے جرائم کا ارتکاب کیا۔

بیان میں کہا گیا کہ اکتوبر 2023 سے اسرائیلی فوج نے غزہ میں رہائشی عمارتوں، اسپتالوں اور امدادی قافلوں پر حملے کیے، جن کے نتیجے میں سیکڑوں بے گناہ شہری، جن میں بچے بھی شامل تھے، جاں بحق ہوئے۔

ترک پراسیکیوٹرز نے یاد دلایا کہ اسرائیل نے ماضی میں "گلوبل فلوٹیلا مشن” پر بھی جارحیت کی تھی، جو غزہ کے محصور عوام کے لیے انسانی امداد لے کر جا رہا تھا۔ ان واقعات کو انسانی حقوق اور بین الاقوامی قوانین کی صریح خلاف ورزی قرار دیا گیا ہے۔

ترکیہ طویل عرصے سے غزہ پر اسرائیلی مظالم کے خلاف عالمی سطح پر آواز بلند کر رہا ہے، اسرائیلی جارحیت میں شدت آنے کے بعد ترکیہ نے تل ابیب سے اپنے سفارتی تعلقات معطل کر دیے اور تجارتی روابط بھی منقطع کر دیے تھے۔

نیتن یاہو اور دیگر اسرائیلی عہدیداروں کے خلاف وارنٹ گرفتاری ایسے وقت میں جاری کیے گئے ہیں جب عالمی عدالت انصاف کی جانب سے بھی نیتن یاہو اور سابق وزیر دفاع یوآو گیلنٹ کے خلاف جنگی جرائم کے مقدمے پر کارروائی کو ایک سال مکمل ہو چکا ہے۔

ترک حکام کے مطابق یہ اقدام عالمی ضمیر کو جھنجھوڑنے اور غزہ میں جاری انسانی المیے کو روکنے کے لیے ایک علامتی مگر اہم پیغام ہے۔