کونسے افراد اب حج پر نہیں جا سکیں گے؟

سعودی حکومت نے 2026 کے حج کے لیے بیماریوں کی بنیاد پر ایک نئی سخت پابندی عائد کر دی ہے، جس کے تحت بیمار افراد کو حج پر جانے کی اجازت نہیں ہوگی۔

وزارتِ مذہبی امور نے اعلان کیا ہے کہ جو افراد حج پر جانا چاہتے ہیں، انہیں صحت کی مکمل تصدیق کے بعد ہی سفر کی اجازت دی جائے گی۔ سعودی وزارتِ صحت نے حج کے لیے عازمین کے صحت کے معیار کے حوالے سے نئی شرائط وضع کی ہیں۔

ان شرائط میں کینسر، دل کی بیماری، گردوں کی بیماری، پھیپھڑوں اور جگر کی بیماریوں کے علاوہ رعشہ، نفسیاتی امراض، کمزور یادداشت، ضعیف افراد، حاملہ خواتین اور وہ افراد جنہیں کالی کھانسی، تپ دق یا وائرل ہیمرج بخار جیسے انفیکشنز ہیں، انہیں حج کرنے کی اجازت نہیں ہوگی۔

وزارتِ مذہبی امور نے واضح کیا ہے کہ اگر کوئی ڈاکٹر کسی بیمار فرد کو جھوٹا میڈیکل سرٹیفکیٹ فراہم کرتا ہے تو اس کے خلاف سخت کارروائی کی جائے گی۔ اس کے علاوہ، جو بھی عازمین حج غیر صحت مند پایا جائے گا، اسے سعودی عرب سے ڈی پورٹ کیا جائے گا اور اس کے تمام اخراجات خود اُسی عازم حج کو برداشت کرنا ہوں گے۔

سعودی حکام کی مانیٹرنگ ٹیمیں عازمین حج کے فٹنس سرٹیفکیٹ کی تصدیق کریں گی تاکہ یہ یقینی بنایا جا سکے کہ صرف وہ افراد حج کے لیے روانہ ہوں جو مکمل صحت مند ہوں۔ میڈیکل افسران کو یہ اختیار دیا گیا ہے کہ وہ کسی بھی بیمار عازم حج کو سفر سے روکنے کا فیصلہ کر سکتے ہیں۔