حج کے خواہش مند افراد کے لیے بری خبر! سعودی حکومت کا سخت اقدام

سعودی حکومت نے بیمار افراد کے لیے حج کرنے پر پابندی عائد کر دی ہے، جس کے بعد عازمین حج کے لیے نئے میڈیکل معیار متعارف کرائے گئے ہیں۔

وزارت مذہبی امور کے مطابق سعودی حکومت کی جانب سے جاری کردہ نئی ہدایات کے مطابق، بیماری کی حالت میں حج کرنے کی اجازت نہیں ہوگی۔

سعودی وزارت صحت کی ہدایات کے مطابق 2026 کے حج کے لیے عازمین حج کو طبی اعتبار سے مکمل صحت مند ہونا ضروری ہوگا، ان شرائط میں کینسر، دل، گردے، پھیپھڑے، جگر کی بیماریاں، رعشہ، نفسیاتی مسائل، کمزور یادداشت اور ضعیفی کے شکار افراد شامل ہیں۔ اس کے علاوہ حاملہ خواتین، کالی کھانسی، تپ دق، یا وائرل ہیمرج بخار میں مبتلا افراد بھی حج نہیں کر سکیں گے۔

وزارت مذہبی امور نے واضح کیا ہے کہ جو ڈاکٹر جعلی یا غلط میڈیکل سرٹیفکیٹ فراہم کریں گے، ان کے خلاف سخت کارروائی کی جائے گی، اس کے علاوہ، بیمار عازمین حج کو واپس بھیج دیا جائے گا اور اس کا تمام خرچ خود مریض کو برداشت کرنا ہوگا۔

سعودی حکام کی مانیٹرنگ ٹیمیں عازمین حج کے فٹنس سرٹیفکیٹ کی تصدیق کریں گی تاکہ یہ یقینی بنایا جا سکے کہ صرف صحت مند افراد ہی حج پر روانہ ہوں۔

وزارت مذہبی امور نے کہا ہے کہ صرف وہ افراد جو طبی اعتبار سے مکمل طور پر صحت مند ہوں گے، انہیں حج کی اجازت دی جائے گی، میڈیکل افسران کو بھی یہ اختیار دیا گیا ہے کہ وہ بیماری کی حالت میں عازمین کو حج پر جانے سے روک سکیں۔

یہ اقدامات سعودی حکومت کی جانب سے حج کی سعادت حاصل کرنے والے افراد کی صحت اور سلامتی کو مدنظر رکھتے ہوئے کیے گئے ہیں تاکہ حج کے دوران کسی بھی قسم کی مشکلات سے بچا جا سکے۔