خطے میں امن کے لیے پاکستان کے ساتھ ہر ممکن تعاون فراہم کرے گا، ایران

ایران کے وزیر خارجہ سید عباس عراقچی نے کہا ہے کہ خطے میں امن کے لیے پاکستان کے ساتھ ہر ممکن تعاون فراہم کرے گا۔

تفصیلات کے مطابق پاکستان کے نائب وزیر اعظم اور وزیر خارجہ اسحاق ڈار اور ایران کے وزیر خارجہ سید عباس عراقچی کے درمیان ٹیلیفونک رابطہ ہوا جس میں دونوں ممالک کے تعلقات اور خطے کی موجودہ صورتحال پر تفصیل سے بات چیت کی گئی۔

دونوں رہنماؤں نے ایران اور پاکستان کے تاریخی دوستانہ تعلقات کو مزید مستحکم کرنے پر اتفاق کیا اور دونوں ممالک کے درمیان دوطرفہ تعاون میں اضافے کا عزم ظاہر کیا۔

ایرانی وزیر خارجہ نے افغانستان میں جاری کشیدگی پر گہری تشویش کا اظہار کرتے ہوئے کہا کہ خطے میں امن کے لیے ایران پاکستان کے ساتھ مل کر ہر ممکن تعاون فراہم کرنے کے لیے تیار ہے۔

انہوں نے دونوں ممالک کے درمیان جاری مکالمے اور تعاون کی اہمیت پر زور دیا تاکہ افغانستان کے مسائل کے حل میں مدد مل سکے۔

پاکستانی وزیر خارجہ اسحاق ڈار نے افغانستان کے ساتھ ہونے والے حالیہ مذاکرات اور ان کے نتائج سے ایرانی ہم منصب کو آگاہ کیا۔

ان کا کہنا تھا کہ پاکستان خطے میں امن و استحکام کے لیے ہر ممکن اقدامات کرے گا اور اس مقصد کے لیے ایران کے ساتھ تعاون جاری رکھے گا۔

دونوں رہنماؤں نے اس بات پر اتفاق کیا کہ خطے میں پائیدار امن اور استحکام کے لیے مشاورت اور تعاون کا سلسلہ جاری رکھا جائے گا تاکہ عالمی سطح پر دونوں ممالک کے تعلقات مزید مضبوط ہوں۔