شیاع السودانی کی زیر قیادت اتحاد نے عراق انتخابات میں میدان مار لیا

عراق میں ہونے والے حالیہ پارلیمانی انتخابات کے ابتدائی نتائج سامنے آگئے۔

 آزاد اعلیٰ انتخابی کمیشن کے مطابق وزیراعظم محمد شیاع السودانی کے سیاسی اتحاد نے سب سے زیادہ ووٹ حاصل کیے ہیں۔ کمیشن نے بتایا کہ السودانی کے اتحاد کو تقریباً تیرہ لاکھ ستر ہزار ووٹ ملے، جس سے وہ نتائج میں سب سے آگے ہیں۔

یہ فتح السودانی کے لیے حکومت کا دوسرا موقع ثابت ہوسکتی ہے۔ غیر ملکی میڈیا کے مطابق انتخابی کمیشن کے دو سینئر اہلکاروں نے بھی تصدیق کی کہ السودانی کا اتحاد پہلی پوزیشن پر رہا۔ دوسری جانب ایک بڑی تعداد میں نوجوان ووٹرز کا خیال ہے کہ یہ انتخابات روایتی جماعتوں کے درمیان اقتدار اور وسائل کی تقسیم تک محدود ہیں۔

اپنے بیان میں وزیراعظم السودانی نے کہا کہ وہ ملک میں سیاسی بے یقینی کے بعد اصلاحات اور استحکام لانا چاہتے ہیں۔ ان کا کہنا تھا کہ وہ اب پرانی سیاسی طاقتوں کے دباؤ سے آزاد ہو چکے ہیں اور عوام کے مفاد کو ترجیح دیں گے۔

عراق کی 329 رکنی پارلیمنٹ میں کوئی بھی پارٹی مکمل اکثریت حاصل نہیں کر سکی۔ اسی لیے حکومت سازی کے لیے سیاسی جماعتوں کو ایک دوسرے کے ساتھ اتحاد بنانا ہوگا۔ یہ عمل کئی بار کئی ہفتوں بلکہ مہینوں تک چلتا ہے۔

کمیشن کے مطابق اس بار ووٹر ٹرن آؤٹ 56 فیصد سے زیادہ رہا، جسے ایک مثبت اشارہ قرار دیا جا رہا ہے۔ مبصرین کا کہنا ہے کہ عوام کی بڑی تعداد کا ووٹ ڈالنا اس بات کا ثبوت ہے کہ لوگ سیاسی نظام پر دوبارہ اعتماد بحال کر رہے ہیں۔