اسرائیلی وزیراعظم کے خلاف مالی بدعنوانی کے مقدمات فیصلہ کن مرحلے میں داخل

اسرائیلی وزیراعظم بنیامین نتن یاہو کے خلاف مالی بدعنوانی کے مقدمات فیصلہ کن مرحلے میں داخل ہو رہے ہیں، اور ان کے سیاسی مستقبل کے حوالے سے اسرائیل میں بے چینی بڑھتی جا رہی ہے۔

عدالتی سماعتوں میں تیزی اور ممکنہ قانونی نتائج نے حکومتی حلقوں اور اپوزیشن دونوں کو متحرک کر دیا ہے۔

اس صورتحال کے دوران امریکی صدر ڈونلڈ ٹرمپ نے اسرائیلی صدر اسحاق ہرتزوگ کو ایک خط بھیج کر نتن یاہو کے لیے مخصوص معافی کی سفارش کی ہے، لیکن قانونی ماہرین کے مطابق اسرائیلی صدر جاری مقدمات میں مداخلت نہیں کرسکتے، بلکہ صرف ایسے افراد کو معافی دینے یا سزا میں کمی کا اختیار رکھتے ہیں جنہیں عدالت پہلے ہی سزا سنا چکی ہو۔

سیاسی تجزیہ کاروں کا کہنا ہے کہ موجودہ حالات میں نتن یاہو کے سامنے تین راستے موجود ہیں۔ پہلا یہ کہ اگر وہ اعترافِ جرم کے بدلے مختصر مدت کی سزا پر راضی ہو جائیں، ایسی سزا جو تین ماہ سے کم ہو تو وہ بعد میں صدارتی معافی حاصل کرکے اپنی سیاسی پوزیشن بچا سکتے ہیں۔ لیکن ایسا قدم ان کی سیاسی ساکھ کے لیے بھاری قیمت ثابت ہوگا۔

دوسرا امکان یہ ہے کہ وہ اپنے خلاف الزامات کی تردید جاری رکھتے ہوئے مکمل قانونی جنگ لڑیں۔ اس صورت میں عدالت کے فیصلے کے بعد ہی وہ معافی کی درخواست کر سکیں گے۔ تاہم اگر سزا تین ماہ سے زیادہ ہوئی تو انہیں سات برس تک پارلیمان کے انتخابات میں حصہ لینے کی اجازت نہیں ہوگی، سوائے اس کے کہ عدالت ان کے جرم کو اخلاقی بدعنوانی کے زمرے میں شامل نہ کرے۔

تیسرا راستہ اس وقت کھل سکتا ہے اگر عدالت انہیں قید سے بچنے والی کوئی سزا سنائے۔ مثلاً جرمانہ یا معطل سزا۔ ایسی صورت میں وہ کسی قانونی رکاوٹ کے بغیر سیاست میں سرگرم رہ سکیں گے اور انتخابات میں بھی حصہ لے سکیں گے۔

اسرائیلی میڈیا کے مطابق صدر ہرتزوگ نے ٹرمپ کے پیغام کے جواب میں کہا ہے کہ اگر نتن یاہو معافی چاہتے ہیں تو انہیں رسمی درخواست دینا ہوگی۔

ادھر اپوزیشن لیڈر یائیر لاپید نے یاد دلایا ہے کہ اسرائیلی قانون کے تحت معافی کے لیے سب سے پہلا تقاضا جرم کا اعتراف اور ندامت ہے۔

نتن یاہو کے خلاف رشوت، دھوکا دہی اور اختیارات کے ناجائز استعمال کے مقدمات 2020 سے جاری ہیں۔ حالیہ ہفتوں میں ان مقدمات کی سماعتوں کی رفتار بڑھا دی گئی ہے اور اب ہفتے میں چار بار سماعتیں ہو رہی ہیں، جس سے عدالتی فیصلے کے قریب آنے کے آثار نمایاں ہو رہے ہیں۔