عراق میں انتخابات کے بعد حکومت سازی کے چار مراحل

عراق میں حالیہ پارلیمانی انتخابات کے ابتدائی نتائج سامنے آتے ہی ملک میں سیاسی سرگرمیاں تیز ہوگئی ہیں۔

 نتائج کے بعد یہ مرحلہ اب ایک نئے اور پیچیدہ سیاسی عمل میں داخل ہو چکا ہے، جس میں قانونی اعتراضات سے لے کر نئی حکومت کی تشکیل تک کئی مراحل شامل ہیں۔

ابتدائی اعداد و شمار کے مطابق موجودہ وزیر اعظم محمد شیاع السودانی کے اتحاد "الإعمار والتنمیه” نے سب سے زیادہ نشستیں حاصل کی ہیں۔ اس اتحاد نے 46 نشستیں اپنے نام کیں، جس کے بعد نوری المالکی اور محمد الحلبوسی کے سیاسی گروپس آتے ہیں۔ ماہرین کے مطابق یہ نتائج آئندہ حکومت میں اہم کردار ادا کریں گے۔

حکومت سازی کا عمل چار بڑے مرحلوں پر مشتمل ہوتا ہے۔ پہلے مرحلے میں سیاسی جماعتیں ابتدائی نتائج پر اعتراضات دائر کرتی ہیں، جس کے بعد متعلقہ عدالتی کمیٹی اعتراضات کا جائزہ لے کر نتائج کی توثیق کرتی ہے۔ دوسرے مرحلے میں صدرِ مملکت نئے پارلیمان کا اجلاس بلاتے ہیں، جہاں اسپیکر اور اس کے دو نائبین کا انتخاب کیا جاتا ہے۔

تیسرے مرحلے میں پارلیمان دو تہائی اکثریت سے صدر کا انتخاب کرتی ہے۔ یہ عہدہ عموماً کرد برادری کے پاس جاتا ہے۔ صدر منتخب ہونے کے بعد وہ سب سے بڑی پارلیمانی جماعت کو حکومت بنانے کی دعوت دیتے ہیں۔ چوتھے مرحلے میں سیاسی جماعتیں کابینہ کی تشکیل کے لیے مذاکرات شروع کرتی ہیں، جو اکثر کئی ہفتوں یا مہینوں تک جاری رہتے ہیں۔

انتخابی قانون کے مطابق امیدواروں کو نتائج پر اعتراض کے لیے تین دن کا وقت دیا گیا ہے، جبکہ کمیٹی کے پاس دس دن کا وقت ہوگا کہ وہ اعتراضات کا فیصلہ کرے۔ نتائج کی توثیق کے بعد صدر 15 دن میں پارلیمان کا اجلاس طلب کریں گے۔

ماہرین کہتے ہیں کہ موجودہ سیاسی صورتحال کو دیکھتے ہوئے حکومت سازی میں تاخیر ممکن ہے۔ 2021 کے انتخابات کے بعد بھی عراق میں نئی حکومت کے قیام میں کئی مہینے لگے تھے۔ سیاسی جماعتوں کے بیچ سخت مقابلہ اور بیرونی طاقتوں کی دلچسپی بھی سیاسی اتفاق رائے میں رکاوٹ بن سکتی ہے۔