بنگلا دیشی عدالت نے شیخ حسینہ کو سزائے موت سنادی

ڈھاکا: بنگلادیش کی سابق وزیراعظم شیخ حسینہ واجد کے خلاف مبینہ ریاستی جرائم کے مقدمے کا فیصلہ سناتے ہوئے خصوصی عدالت نے انہیں سزائے موت کا حکم سنا دیا ہے۔

عدالت کا کہنا تھا کہ کیس میں پیش کیے گئے شواہد کے مطابق سابق وزیراعظم کے دورِ حکومت میں مظاہرین کے خلاف طاقت کے "غیر متناسب اور سخت استعمال” کے واقعات پیش آئے۔

فیصلے میں کہا گیا کہ حسینہ واجد نے اپنے اقتدار کے دوران ملک بھر میں جاری مظاہروں کو روکنے کے لیے قانون نافذ کرنے والے اداروں کو مہلک ہتھیاروں کے استعمال کی اجازت دی جس کے نتیجے میں متعدد شہری ہلاک اور زخمی ہوئے۔

عدالت کے مطابق حکومتی اختیارات کا ناجائز استعمال اور شہری آزادیوں کی سنگین خلاف ورزیاں مقدمے کا مرکزی حصہ تھیں۔

فیصلے کے اعلان کے بعد سیکیورٹی فورسز نے دارالحکومت کے حساس مقامات پر سیکیورٹی سخت کردی۔

سابق وزیراعظم کی قانونی ٹیم نے فیصلے کو "سیاسی انتقام” قرار دیتے ہوئے کہا ہے کہ وہ اسے اعلیٰ عدالت میں چیلنج کرے گی۔

دوسری جانب حکومتی ترجمان کا کہنا ہے کہ فیصلہ "قانونی تقاضوں اور شواہد کی بنیاد پر” سنایا گیا ہے۔

سزائے موت کے فیصلے پر شیخ حسینہ واجد کا ردِعمل سامنے آ گیا

سابق وزیراعظم بنگلادیش شیخ حسینہ واجد کا سزائے موت کے فیصلے پر ردِعمل سامنے آ گیا ہے۔

شیخ حسینہ واجد نے اپنے ایک بیان میں کہا کہ ان پر لگائے گئے الزامات “جھوٹے” ہیں اور وہ اپنے حامیوں کو یقین دلاتی ہیں کہ انہیں پریشان ہونے کی ضرورت نہیں۔

ان کا کہنا تھا کہ مجھے جو فیصلہ سنانا ہے، سنادیں، مجھے پرواہ نہیں اور میری زندگی خدا کے ہاتھ میں ہے۔

حسینہ واجد کا یہ بھی کہنا ہے کہ وہ اپنے ملک کے عوام کے لیے کام کرتی رہیں گی اور “کارکنوں کی مشکلات سے آگاہ ہوں” ان کا وعدہ ہے کہ “ہر چیز کا حساب ہوگا”۔