ایران کسی بھی بیرونی جارحیت کا بھرپور جواب دینے کے لیے پوری طرح تیار ہے، ایرانی آرمی چیف

ایران کے آرمی چیف میجر جنرل امیر حاتمی نے کہا ہے کہ ایران کسی بھی بیرونی جارحیت کا بھرپور جواب دینے کے لیے پوری طرح تیار ہے۔

رپورٹ کے مطابق ایران کے آرمی چیف میجر جنرل امیر حاتمی نے تہران میں فوجی ہیڈکوارٹرز میں ایرانی پارلیمنٹ کی تعمیراتی کمیٹی کے اراکین سے ملاقات کی، اس موقع پر انہوں نے ایرانی مسلح افواج کی دفاعی برتری کو مستحکم رکھنے کی اہمیت پر زور دیا۔

انہوں نے کہا کہ ایران اپنی دفاعی صلاحیتوں کو مسلسل تقویت دے رہا ہے اور کسی بھی بیرونی جارحیت کا بھرپور جواب دینے کے لیے پوری طرح تیار ہے۔

ان کا کہنا تھا کہ ہم نے اپنے دفاعی شعبے میں ہر لمحہ کو قیمتی جانا ہے اور مسلسل اپنی فوجی صلاحیتوں میں اضافہ کر رہے ہیں تاکہ ایران کی دفاعی پوزیشن کو مزید مستحکم کیا جا سکے۔

میجر جنرل امیر حاتمی نے کہا کہ ملک کی دفاعی طاقت کے تمام ذرائع، بشمول مسلح افواج اور فوجی عناصر، ایران کی طاقتور دفاعی قوت کے بنیادی ستون ہیں۔

آرمی چیف نے 12 روزہ جنگ کے دوران ایران کی فوجی کارکردگی کا حوالہ دیتے ہوئے کہا کہ رہبر معظم آیت اللہ خامنہ ای کی قیادت، فوج کی کوششیں اور عوام کی یکجہتی نے ایران کو جنگ بندی پر مجبور کرنے میں کلیدی کردار ادا کیا۔

انہوں بتایا کہ 12 روزہ جنگ کے تجربات نے ایران کی فوجی تیاری کو مزید بہتر بنانے میں مدد دی ہے، اس دوران ایران نے دشمن کی جارحیت کا دلیری سے مقابلہ کیا، جس کے نتیجے میں امریکہ اور اسرائیل نے ایران کی جوہری تنصیبات کو بمباری کا نشانہ بنایا۔ جواب میں ایرانی افواج نے اسرائیل اور امریکی فوجی اڈوں کو نشانہ بنایا، جو ایران کی دفاعی طاقت کا مظہر تھا۔

ایرانی فوج کے چیف آف اسٹاف ایڈمرل حبیب اللہ سیاری نے پارلیمنٹ سے فوجی انفراسٹرکچر کی مزید ترقی کے لیے مدد کی اپیل کی۔

ان کا کہنا تھا کہ ملک کی دفاعی صلاحیتوں میں اضافے کے لیے انجینئرنگ کے بجٹ میں اضافہ ضروری ہے، اور فوجی سہولیات، عمارتوں اور زمینوں کے اثاثے اس کے لیے اہم ہیں۔

جنرل حاتمی نے اسرائیل کی ایران پر 13 جون کو کی گئی جارحیت کا بھی ذکر کیا، جس کے نتیجے میں 12 روزہ جنگ چھڑ گئی تھی۔ اس جنگ میں ایرانی فوجی کمانڈرز، جوہری سائنسدان اور عام شہریوں سمیت 1064 افراد شہید ہوئے۔

اس جنگ کے دوران امریکا نے بھی ایران کی جوہری تنصیبات پر بمباری کی، جسے بین الاقوامی قوانین کی خلاف ورزی قرار دیا گیا۔ ایران نے جوابی کارروائی کرتے ہوئے اسرائیل اور قطر میں امریکی فوجی اڈوں کو نشانہ بنایا۔