عوامی یکجہتی نے ایران کے دشمنوں کے عزائم خاک میں ملا دیے، صدر پزشکیان

ایران کے صدر ڈاکٹر مسعود پزشکیان نے کہا ہے کہ ملک میں عوامی یکجہتی اور قومی ہم آہنگی نے صہیونی حکومت اور اس کے حامیوں کے عزائم کو ناکام بنانے میں بنیادی کردار ادا کیا۔

ایک تقریب سے خطاب کرتے ہوئے انہوں نے کہا کہ معاشروں کی تباہی کی سب سے بڑی وجہ اندرونی اختلافات ہوتے ہیں، اس لیے امیرالمؤمنین حضرت علیؑ نے اپنے آخری لمحات میں بھی لوگوں کو باہمی رنجشیں ختم کرنے اور اتحاد برقرار رکھنے کی نصیحت کی تھی۔

صدر پزشکیان نے کہا کہ اسرائیل، امریکا اور استعماری طاقتیں اس لیے ایران کے بارے میں غلط اندازہ لگاتی رہیں کیونکہ انہیں یہ توقع نہیں تھی کہ عوام اس طرح متحد ہوکر میدان میں اتریں گے۔

ان کے مطابق دفاعی صلاحیتیں اپنی جگہ اہم ہیں، لیکن عوامی اتحاد اور رہبر معظم سے وابستگی نے دشمن کے منصوبوں کو عملی طور پر ناکام بنا دیا۔

انہوں نے کہا کہ جب دشمنوں نے ایران کے خلاف کوئی اقدام کرنے کی کوشش کی تو عوام کی استقامت اور یکجہتی نے انہیں پیچھے ہٹنے پر مجبور کر دیا۔

صدر کے مطابق اگر یہ اتحاد برقرار رہا تو کوئی بھی طاقت ایران کی زمینی یا سمندری سرحدوں کی طرف میلی آنکھ سے دیکھنے کی جرأت نہیں کرے گی۔

اپنے خطاب کے اختتام پر صدر پزشکیان نے دشمن قوتوں کو مخاطب کرتے ہوئے کہا کہ اگر ہزاروں قربانیاں بھی پیش کرنا پڑیں تو ایرانی قوم پیچھے نہیں ہٹے گی، بلکہ ہر شہید کی جگہ سینکڑوں نئے سپوت سامنے آئیں گے اور ملک ترقی و خوشحالی کی طرف آگے بڑھتا رہے گا۔