امریکی صدر ڈونلڈ ٹرمپ نے سعودی عرب کو اہم نان نیٹو اتحادی قرار دے دیا

امریکا نے سعودی عرب کو ایک بڑی سفارتی پیش رفت کے تحت اہم نان نیٹو اتحادی کا درجہ دے دیا۔

یہ اعلان امریکی صدر ڈونلڈ ٹرمپ نے کیا۔ اس فیصلے کے بعد دونوں ممالک کے دفاعی اور اسٹریٹیجک تعلقات مزید مضبوط ہو جائیں گے۔

صدر ٹرمپ نے وائٹ ہاؤس میں سعودی ولی عہد شہزادہ محمد بن سلمان کے اعزاز میں خصوصی عشائیہ دیا۔ اس تقریب میں ایلون مسک اور فٹبال اسٹار کرسٹیانو رونالڈو بھی موجود تھے۔ تقریب میں دونوں ممالک کے درمیان دفاعی تعاون پر بھی بات ہوئی۔

صدر ٹرمپ نے بتایا کہ امریکا اور سعودی عرب کے درمیان اسٹریٹیجک دفاعی معاہدے پر دستخط ہوچکے ہیں۔ انہوں نے کہا کہ امریکا اور سعودی عرب کے درمیان تاریخی تعلقات ہیں اور اب یہ رشتہ مزید مضبوط ہو رہا ہے۔

بعد ازاں جاری ہونے والے اعلامیے میں کہا گیا کہ امریکا نے سعودی عرب کے لیے بڑے دفاعی پیکج کی منظوری دے دی ہے۔ اس پیکج میں ایف 35 لڑاکا طیاروں کی فراہمی بھی شامل ہے۔ سعودی عرب امریکا سے تقریباً 300 ٹینک بھی خریدے گا۔

ٹرمپ نے اپنے خطاب میں یہ بھی کہا کہ مشرق وسطیٰ میں امن کی کوششیں تیزی سے آگے بڑھ رہی ہیں۔ ان کے مطابق موجودہ صورت حال میں غزہ پہلے کے مقابلے میں زیادہ محفوظ ہے۔ انہوں نے یہ بھی بتایا کہ غزہ پیس بورڈ میں کئی عالمی رہنما شامل ہو رہے ہیں۔

ٹرمپ نے کہا کہ حماس کی جانب سے مزید یرغمالیوں کی لاشیں اسرائیل کے اہل خانہ کے حوالے کی گئی ہیں۔ اس موقع پر سعودی ولی عہد نے بھی اظہارِ خیال کیا اور کہا کہ امریکا کے ساتھ تعلقات ہمیشہ بہترین رہے ہیں اور یہ دوستی مزید مضبوط ہوگی۔

سعودی ولی عہد اس وقت امریکا کے دورے پر ہیں۔ وائٹ ہاؤس کے مطابق دونوں ممالک کے درمیان سول نیوکلیئر معاہدے پر بھی اتفاق ہوا ہے۔ اس سے دونوں ممالک مستقبل میں توانائی کے شعبے میں بھی قریبی تعاون کریں گے۔