امریکا میں گرین کارڈ ہولڈرز کیلئے بڑی خبر آگئی

امریکا میں مقیم گرین کارڈ ہولڈرز کے لیے ایک اہم اعلان سامنے آیا ہے۔

 ٹرمپ انتظامیہ نے فیصلہ کیا ہے کہ 19 ممالک سے تعلق رکھنے والے افراد کے جاری شدہ گرین کارڈز کی دوبارہ جانچ کی جائے گی۔ اس فیصلے نے امریکا میں رہنے والے ہزاروں تارکین وطن میں تشویش پیدا کر دی ہے۔

خبر ایجنسی کے مطابق ان ممالک میں افغانستان، ایران، کیوبا، ہیٹی، صومالیہ، میانمار، چاڈ، جمہوریہ کانگو، لیبیا، وینزویلا اور چند دیگر ریاستیں شامل ہیں۔ انتظامیہ کا کہنا ہے کہ ان ممالک سے آنے والے افراد کی سیکیورٹی کلیئرنس کو مزید سخت کیا جائے گا۔

یہ فیصلہ اس واقعے کے بعد سامنے آیا ہے جس میں ایک افغان شہری نے نیشنل گارڈ کے اہلکاروں پر فائرنگ کی۔ اس واقعے کے بعد وائٹ ہاؤس نے سیکیورٹی پالیسیوں کو مزید سخت کرنے کی ہدایت کی ہے۔

یو ایس سٹیزن شپ اینڈ امیگریشن سروسز کے سربراہ جوزف ایڈلو نے کہا کہ صدر نے واضح حکم دیا ہے کہ ایسے ممالک سے آنے والوں کی مکمل اور تفصیلی جانچ کی جائے جو امریکا کے لیے تشویش کا باعث بن سکتے ہیں۔ انہوں نے کہا کہ امریکی عوام سابقہ حکومت کی پالیسیوں کا بوجھ مزید برداشت نہیں کرنا چاہتے۔

اس سے قبل امریکی صدر نے کہا تھا کہ وہ ایسے تارکین وطن کی شہریت بھی منسوخ کر سکتے ہیں جو ملک کے امن کے لیے خطرہ بنیں۔ ساتھ ہی انہوں نے یہ بھی کہا کہ ایسے غیر ملکیوں کو ملک بدر کیا جائے گا جو کسی جرم میں ملوث ہوں یا امریکی اقدار سے مطابقت نہ رکھتے ہوں۔