حزب اللہ نے اسرائیل کے ساتھ نئی جنگ کے امکان کا اشارہ دے دیا

بیروت: حزب اللہ کے ڈپٹی سیکرٹری جنرل شیخ نعیم قاسم نے کہا ہے کہ کمانڈر ہیثم طباطبائی کی شہادت صرف حزب اللہ پر نہیں بلکہ پورے لبنان پر حملہ ہے، اور اس کا بدلہ لینا تنظیم کی اولین ترجیح ہے۔

شہید طباطبائی کی یاد میں منعقدہ تقریب سے خطاب کرتے ہوئے شیخ نعیم قاسم نے کہا کہ حزب اللہ مناسب وقت خود طے کرے گی اور اسرائیلی حملے کا بھرپور جواب دیا جائے گا۔

انہوں نے کہا کہ ہیثم طباطبائی ایک اہم عسکری شخصیت تھے جو کئی حساس محاذوں پر قائدانہ کردار ادا کرتے رہے۔ خصوصی فورسز کے منصوبوں کی برسوں تک قیادت سے لے کر 2006 کی جنگ میں الخیام کے محاذ پر ان کی مزاحمت تک، ان کی خدمات ناقابلِ فراموش ہیں۔

شیخ نعیم قاسم کے مطابق اسرائیل مغربی، امریکی اور بعض عرب انٹیلی جنس اداروں کے تعاون سے علاقے میں آزادانہ کارروائیاں کر رہا ہے، لیکن حزب اللہ کی مزاحمت نے ہمیشہ اس کے منصوبوں کو ناکام بنایا ہے۔

انہوں نے کہا کہ تنظیم کی طاقت ہر دور میں بحال ہوتی رہی ہے اور نئے کمانڈر قیادت سنبھالنے کے لیے تیار ہیں۔

انہوں نے مزید کہا کہ شہید طباطبائی کا اثر لبنان سے باہر بھی محسوس کیا گیا اور یمن میں ان کی خدمات کو بھی بے حد قدر کی نگاہ سے دیکھا جاتا ہے۔ ان کی شہادت ایک بڑا نقصان ہے لیکن ان کا مشن آگے بڑھتا رہے گا۔

اپنے خطاب میں انہوں نے لبنانی حکومت کی ذمہ داریوں کی طرف بھی توجہ دلائی۔

ان کا کہنا تھا کہ اسرائیلی حملوں کا مقصد صرف مزاحمتی گروپس کو نشانہ بنانا نہیں بلکہ پورے ملک کو دباؤ میں لانا ہے۔ حکومت کو چاہیے کہ اسرائیلی پیش قدمی کو روکنے کے لیے زیادہ مؤثر اقدامات کرے اور قومی دفاع کے لیے تمام اداروں کو متحرک کرے۔

انہوں نے کہا کہ اسرائیل کبھی بھی مزاحمت کی موجودگی میں لبنان میں گھس بیٹھ نہیں کر سکتا۔ حزب اللہ کے ہتھیار لبنانی عوام کی حفاظت کے لیے ہیں، اور انہیں ختم کرنے کی کوشش دراصل اسرائیلی مفادات کی تکمیل ہے۔

شیخ نعیم قاسم نے زور دیتے ہوئے کہا کہ لبنان ایک نئے مرحلے میں داخل ہو چکا ہے، جہاں قومی یکجہتی اور سیاسی ذمہ داری پہلے سے کہیں زیادہ ضروری ہے۔ حزب اللہ دفاع کے لیے تیار ہے اور حکومت کو چاہیے کہ اس تیاری کا فائدہ اٹھائے۔