ٹیکساس میں بم بنانے کا دعویٰ کرنیوالا افغان نژاد شخص گرفتار

واشنگٹن: امریکی ریاست ٹیکساس میں بم بنانے کا دعویٰ کرنے والے افغان نژاد شخص کو سیکیورٹی اداروں نے گرفتار کر لیا ہے۔

امریکی میڈیا کے مطابق ڈپارٹمنٹ آف ہوم لینڈ سیکیورٹی نے منگل کے روز کارروائی کرتے ہوئے مشتبہ شخص کو حراست میں لیا، جس کے خلاف باقاعدہ قانونی کارروائی شروع کر دی گئی ہے۔

گرفتار فرد کی شناخت محمد داؤد الوک زئی کے نام سے ہوئی ہے، جو "آپریشن الائیز ویلکم” پروگرام کے ذریعے امریکا منتقل ہوا تھا۔ دستاویزات سے معلوم ہوا ہے کہ الوک زئی کو 7 ستمبر 2022 کو امریکا کی مستقل رہائش (گرین کارڈ) بھی جاری کیا گیا تھا۔

امریکی حکام کے مطابق الوک زئی نے سوشل میڈیا پلیٹ فارم ٹک ٹاک پر ایک ویڈیو شیئر کی تھی، جس میں اس نے مبینہ طور پر کہا تھا کہ وہ بم تیار کر رہا ہے اور فورٹ ورتھ شہر کو نشانہ بنانے کا منصوبہ رکھتا ہے۔

ویڈیو سامنے آنے کے بعد قانون نافذ کرنے والے ادارے فوری طور پر حرکت میں آگئے۔

رپورٹس کے مطابق یہ واقعہ ایسے وقت میں سامنے آیا ہے جب چند روز قبل ہی ایک اور افغان شہری رحمان اللہ لکنوال کو وائٹ ہاؤس کے قریب نیشنل گارڈز کے اہلکاروں پر فائرنگ کے الزام میں گرفتار کیا گیا تھا۔ لکنوال بھی 2021 میں افغانستان سے امریکا منتقل ہوا تھا۔

امریکی حکام کا کہنا ہے کہ سوشل میڈیا پر دھمکی آمیز مواد کو سنجیدگی سے لیا جا رہا ہے اور عوامی تحفظ کے لیے مزید تحقیقات جاری ہیں۔