دبئی میں نوکری تلاش کرنے والوں کیلئے بڑی خبر آگئی

متحدہ عرب امارات میں ریکروٹمنٹ کے ماہرین نے کہا ہے کہ دسمبر کا مہینہ نوکری تلاش کرنے والوں کے لیے خاص طور پر فائدہ مند ہوتا ہے۔

ان کے مطابق سال کے آخر میں زیادہ تر لوگ چھٹیوں میں مصروف ہوجاتے ہیں، اس لیے ملازمت کے لیے مقابلہ کم رہتا ہے۔ اس صورتحال میں امیدواروں کو کمپنیوں کی زیادہ توجہ مل سکتی ہے۔

ماہرین کا کہنا ہے کہ کرسمس اور نیو ایئر کے دوران دنیا کے کئی ملکوں میں کام کی رفتار کم ہوتی ہے، مگر یہ وقت اُن امیدواروں کے لیے بہترین ثابت ہوسکتا ہے جو نوکری کے پورٹلز پر مسلسل فعال رہتے ہیں۔ اس دوران کمپنیوں کے پاس بھی فرصت ہوتی ہے کہ وہ درخواستوں کو اچھی طرح دیکھ سکیں۔

یو اے ای میں عام تاثر یہ ہے کہ دسمبر میں بھرتی سست ہوجاتی ہے، مگر ریکروٹمنٹ ایکسپرٹس کے مطابق ایسا نہیں ہے۔ ان کا کہنا ہے کہ کمپنیاں سال کے آخر میں بھی ملازمین کی تلاش جاری رکھتی ہیں، کیونکہ نئے سال کے لیے منصوبہ بندی اسی دوران ہوتی ہے۔

مارک ایلِس کنسلٹنگ اینڈ ٹریننگ کے شریک بانی زید الہیلی کے مطابق یورپ اور امریکا میں کاروباری سرگرمیاں ضرور سست ہوتی ہیں، لیکن خلیجی ممالک، خاص طور پر جی سی سی میں یہ صورتحال مختلف ہے۔ جی سی سی میں کمپنیوں کی بھرتی کا عمل دسمبر میں بھی معمول کے مطابق جاری رہتا ہے۔