ٹیرف میرا پسندیدہ لفظ ہے اس سے ملک میں اربوں ڈالر آ رہے ہیں، امریکی صدر

امریکی صدر ڈونلڈ ٹرمپ نے پنسلوانیا میں ایک اہم تقریب سے خطاب کرتے ہوئے کہا کہ ٹیرف اب ان کا "پسندیدہ لفظ” بن چکا ہے کیونکہ اس کے ذریعے امریکہ میں اربوں ڈالر کی آمد ہوئی ہے۔

صدر ٹرمپ کے مطابق حکومت نے ان رقوم سے امریکی کسانوں کو 12 ارب ڈالر کی امداد فراہم کی ہے۔

تقریب میں انہوں نے معاشی ترقی، سرمایہ کاری، بیرونی تعلقات اور سرحدی سیکیورٹی کے حوالے سے متعدد بڑے دعوے کیے۔

صدر ٹرمپ نے بتایا کہ ایک انرجی کمپنی پنسلوانیا میں 10 ارب ڈالر کی سرمایہ کاری کرے گی، جو امریکی معیشت کے لیے خوش آئند اقدام ہے۔

مزید برآں، صدر ٹرمپ نے دعویٰ کیا کہ سعودی عرب، قطر اور متحدہ عرب امارات نے امریکہ میں 4 ٹریلین ڈالر کی سرمایہ کاری کا اعلان کیا ہے، اور تینوں ممالک کے سربراہان کے مطابق ایک سال کے اندر امریکہ دوبارہ ایک طاقتور ملک بن گیا ہے۔

معاشی صورتحال پر بات کرتے ہوئے صدر ٹرمپ نے کہا کہ ملک میں تیل کی قیمت دو ڈالر فی گیلن سے نیچے آ گئی ہے اور ان کی کوششوں کی بدولت محنت کش طبقے کی آمدن دوگنی ہو گئی ہے۔

انہوں نے سابق صدر جو بائیڈن پر تنقید کرتے ہوئے کہا کہ ان کی حکومت ورکنگ کلاس کے خلاف تھی اور ان کے دور میں 2 کروڑ 50 لاکھ افراد غیر قانونی طور پر امریکہ میں داخل ہوئے۔

صدر ٹرمپ نے بارڈر سیکیورٹی کی اہمیت پر زور دیتے ہوئے کہا کہ دنیا کی سخت ترین سرحد شمالی کوریا کی ہے، اور امریکی تاریخ میں پہلی بار ریورس مائیگریشن کا رجحان دیکھنے کو مل رہا ہے۔

عالمی امن کے حوالے سے صدر ٹرمپ نے کہا کہ ان کی حکومت دنیا میں امن قائم رکھنے کے لیے سرگرم ہے۔

انہوں نے دعویٰ کیا کہ پاکستان اور بھارت کے درمیان جنگ بندی کروانے کے علاوہ انہوں نے تھائی لینڈ اور کمبوڈیا کے درمیان بھی کشیدگی کم کروائی۔