آسٹریلیا میں سڈنی کے بونڈی بیچ پر فائرنگ، جاں بحق افراد کی تعداد 16 تک جا پہنچی

آسٹریلیا کے معروف ساحلی علاقے بونڈی بیچ پر پیش آنے والے فائرنگ کے ہولناک واقعے میں ہلاکتوں کی تعداد 16 ہو گئی ہے۔

بین الاقوامی میڈیا رپورٹس کے مطابق یہ واقعہ سڈنی کے ساحل پر اُس وقت پیش آیا جب دو مسلح افراد نے اچانک عوام پر اندھا دھند فائرنگ شروع کر دی۔ حملے کے نتیجے میں 16 افراد جان سے ہاتھ دھو بیٹھے جبکہ 2 پولیس اہلکاروں سمیت 29 افراد زخمی ہو گئے۔

پولیس حکام کا کہنا ہے کہ فوری کارروائی کے دوران ایک حملہ آور مارا گیا جبکہ دوسرے مشتبہ شخص کو زخمی حالت میں گرفتار کر لیا گیا۔ تفتیش کے دوران حملہ آور کی گاڑی سے دھماکا خیز مواد بھی برآمد ہوا ہے۔

یہ واقعہ ایک یہودی مذہبی تہوار کی تقریب کے دوران پیش آیا، حملہ آوروں میں سے ایک کی شناخت نوید اکرم کے طور پر ہوئی ہے، جو سڈنی کا مقامی رہائشی بتایا جا رہا ہے۔

فائرنگ کے بعد سیکیورٹی اداروں نے علاقے کو مکمل طور پر سیل کر دیا جبکہ شہریوں کو بونڈی بیچ سے دور رہنے کی ہدایت جاری کی گئی ہے۔

آسٹریلوی وزیراعظم انتھونی البانیز نے واقعے کی شدید مذمت کرتے ہوئے اسے دہشت گردی قرار دیا ہے۔

دوسری جانب آسٹریلیا کی مسلم کمیونٹی نے بھی واقعے کی مذمت کرتے ہوئے کہا ہے کہ تشدد اور انتہا پسندی کا معاشرے میں کوئی جواز نہیں۔