امریکی میگزین نے پاکستان کو عالمی توجہ کا مرکز قرار دے دیا

امریکی جریدے دی ڈپلومیٹ نے اپنی تازہ رپورٹ میں کہا ہے کہ سن 2025 پاکستان کے لیے کئی برسوں بعد ایک اسٹریٹجک واپسی اور عسکری اعتماد کی بحالی کا سال ثابت ہوا ہے، جس کے باعث پاکستان دوبارہ عالمی توجہ کا مرکز بن گیا ہے۔

رپورٹ کے مطابق پاکستان کی عسکری قیادت نے ریاستی سطح پر انتہا پسندی کے خلاف واضح، دوٹوک اور مضبوط مؤقف اختیار کیا۔ آرمی چیف کی جانب سے یہ مؤقف کہ جہاد کے اعلان کا اختیار صرف ریاست کے پاس ہے، انتہا پسندی کے خلاف ایک اہم سنگِ میل قرار دیا گیا۔

دی ڈپلومیٹ کے مطابق عسکری قیادت کے واضح وژن نے ریاستی رٹ اور نظم و ضبط کو مؤثر انداز میں مضبوط کیا، میگزین نے مئی 2025 میں پاکستان اور بھارت کے درمیان ہونے والی فوجی جھڑپوں کو عالمی سطح پر غیر معمولی توجہ کا مرکز قرار دیا۔

رپورٹ کے مطابق بھارتی عسکری مہم جوئی کے جواب میں پاکستانی افواج کی مؤثر کارکردگی نے خطے میں عسکری توازن واضح کر دیا، جبکہ محدود وسائل کے باوجود پاکستان کی فوج نے بھرپور اور مؤثر ردِعمل دے کر اپنی پیشہ ورانہ صلاحیت ثابت کی۔

دی ڈپلومیٹ کے مطابق ان کامیابیوں نے پاکستان کی اسٹریٹجک ساکھ اور ڈیٹرینس کو تقویت دی، جس کے بعد عالمی دفاعی ماہرین کی توجہ ایک بار پھر پاکستان کی فوج پر مرکوز ہو گئی۔ سن 2025 میں پاکستان کی عسکری کارکردگی نے عالمی سطح پر اعتماد کی بحالی میں اہم کردار ادا کیا۔

رپورٹ میں کہا گیا کہ بھارت کے خلاف کامیابی کے بعد پاکستان اور امریکا کے تعلقات میں نمایاں بہتری آئی، جبکہ پاک بھارت کشیدگی کے بعد بھارت کے واشنگٹن سے تعلقات پر دباؤ بھی دیکھا گیا۔ مشرقِ وسطیٰ میں پاکستان کے دفاعی معاہدوں کو اسٹریٹجک پیش رفت قرار دیتے ہوئے سعودی عرب کے ساتھ بڑے دفاعی تعاون کو پاکستان کے علاقائی کردار کے لیے اہم قرار دیا گیا۔

دی ڈپلومیٹ کے مطابق پاکستان کے دفاعی سازوسامان کی عالمی مانگ میں اضافہ ہوا، جبکہ چین جنگ کے دوران استعمال ہونے والے دفاعی ہتھیاروں کی عملی کارکردگی سے خاصا مطمئن دکھائی دیا۔ رپورٹ میں سی پیک کے دوسرے مرحلے کے لیے سازگار عالمی ماحول بننے کا بھی ذکر کیا گیا۔

افغانستان کے حوالے سے پاکستان کے مؤقف کو واضح اور مدلل قرار دیتے ہوئے کہا گیا کہ ٹی ٹی پی کے خلاف پالیسی میں فیصلہ کن سختی آئی ہے۔ پاکستان نے قطر، ترکیے اور سعودی عرب کو ثالثی کردار میں شامل کر کے سرحد پار خطرات کو عالمی سطح پر مؤثر انداز میں اجاگر کیا، جس سے طالبان حکومت پر دباؤ بڑھا۔

رپورٹ کے مطابق دہشت گردی کے خلاف پاکستان کو اندرونِ ملک نمایاں کامیابیاں ملیں اور مختلف ممالک کے ساتھ انسداد دہشت گردی تعاون میں اضافہ ہوا۔ معاشی مشکلات کے باوجود اصلاحاتی اقدامات میں پیش رفت کو سراہتے ہوئے دی ڈپلومیٹ نے پی آئی اے کی نجکاری کو دو دہائیوں بعد ایک بڑی پیش رفت اور ممکنہ ٹرننگ پوائنٹ قرار دیا۔

میگزین کے مطابق پاکستان کو موجودہ عالمی حالات سے فائدہ اٹھا کر اصلاحات کے لیے ایک نادر موقع ملا ہے، جبکہ انتہا پسندی کے خلاف مؤثر اقدامات کو ریاستی پالیسی کی نئی اور واضح سمت قرار دیا گیا ہے۔