سعودی عرب میں ملازمت کرنے والے پاکستانیوں کیلئے بڑی خوشخبری آگئی

سعودی عرب میں کام کرنے والے پاکستانی کارکنوں کے لیے بیورو آف امیگریشن اینڈ اوورسیز ایمپلائمنٹ نے کام کے اوقات، تنخواہ، اوورٹائم اور آرام سے متعلق تفصیلی رہنما اصول جاری کر دیے ہیں۔

بیورو کے مطابق سعودی عرب میں روزانہ زیادہ سے زیادہ کام کے اوقات آٹھ گھنٹے یا ہفتہ وار 48 گھنٹے مقرر ہیں۔ کام کے دوران ملازمین کو لازمی آرام کے اوقات کا بھی حق حاصل ہے۔ ساتھ ہی، ملازمین پر کام کے نظم و ضبط کو برقرار رکھنے کی ذمہ داری بھی عائد ہوتی ہے۔

پالیسی کے تحت ہر ملازم کو ہفتے میں کم از کم ایک مکمل دن کی چھٹی دی جائے گی۔ یہ چھٹی عموماً جمعہ کو دی جاتی ہے، لیکن اگر کام کی نوعیت کے باعث جمعہ کو چھٹی دینا ممکن نہ ہو تو متبادل دن طے کیا جائے گا۔

بیورو نے مزید واضح کیا ہے کہ اگر ملازم سے مقررہ آٹھ گھنٹوں سے زائد کام لیا جائے تو یہ اوورٹائم کے زمرے میں آئے گا۔ اوورٹائم کی صورت میں ملازم کو اس کی معمول کی اجرت کے ساتھ 50 فیصد اضافی ادائیگی کی جائے گی۔

ماہرین کے مطابق یہ رہنما اصول سعودی عرب میں کام کرنے والے پاکستانیوں کے لیے اہم ہیں کیونکہ یہ نہ صرف ان کے بنیادی حقوق کی حفاظت کرتے ہیں بلکہ انہیں قانونی تحفظ اور آگاہی بھی فراہم کرتے ہیں۔ کارکنان کو مشورہ دیا گیا ہے کہ وہ اپنے حقوق کے بارے میں مکمل معلومات رکھیں اور کسی بھی خلاف ورزی کی صورت میں متعلقہ حکام سے رابطہ کریں۔