کویت جانے والے افراد کیلئے بڑی خبر آگئی

کویت کی وزارت داخلہ نے ملک میں غیر ملکیوں کی رہائش اور وزٹ ویزا سے متعلق نئے ضوابط کا اعلان کر دیا ہے۔

 نئے قواعد کے مطابق غیر ملکیوں کی داخلے اور وزٹ ویزا کی ماہانہ فیس 10 کویتی دینار مقرر کی گئی ہے، جو 23 دسمبر 2025 سے نافذ العمل ہے۔ قانون نمبر 116/2013 کے تحت ملک میں آنے والے غیر ملکی سرمایہ کار اپنے داخلہ اور رہائشی ویزے کے لیے براہ راست سرمایہ کاری پروموشن اتھارٹی (KDIPA) سے درخواست دے سکتے ہیں۔

اہل سرمایہ کاروں کے لیے عام رہائشی اجازت نامے زیادہ سے زیادہ 15 سال تک جاری کیے جا سکتے ہیں۔ یہ اجازت نامے درخواست گزار کی اہلیت کی تصدیق کے بعد جاری کیے جاتے ہیں۔

نئے قواعد غیر ملکی شہریوں کی پیدائش کے اندراج کے لیے چار ماہ کی رعایتی مدت بھی فراہم کرتے ہیں۔ اس مدت کے بعد تاخیر پر جرمانے عائد ہوں گے، جو پہلے مہینے میں روزانہ 2 کویتی دینار سے شروع ہو کر بعد میں 4 کویتی دینار تک بڑھ جائیں گے۔

نئے ضوابط میں گھریلو ملازمین کے لیے بھی قوانین واضح کیے گئے ہیں۔ گھریلو ملازمین کی عمر کم از کم 21 سال اور زیادہ سے زیادہ 60 سال مقرر کی گئی ہے۔ رہائشی پرمٹ آجر کی درخواست پر جنرل ڈائریکٹوریٹ آف ریذیڈنسی اینڈ فارنرز افیئرز کی مدد سے جاری کیے جاتے ہیں۔

رہائشی پرمٹ رکھنے والے ملازمین کو زیادہ سے زیادہ چار ماہ تک ملک سے باہر رہنے کی اجازت ہوگی۔ اس مدت کے بعد رہائش ختم ہو جائے گی جب تک کہ آجر غیر حاضری کے اجازت نامے کے لیے درخواست نہ دے۔ یہ قاعدہ ان ملازمین پر لاگو نہیں ہوگا جو ضوابط کے نافذ ہونے سے قبل ملک چھوڑ چکے ہیں۔

وزارت داخلہ کا کہنا ہے کہ نئے اقدامات کا مقصد غیر ملکی سرمایہ کاروں، رہائشیوں اور آجروں کے لیے واضح اور منظم فریم ورک فراہم کرنا، فیس کا معیاری نظام قائم کرنا اور رہائش کے طریقہ کار کو بہتر بنانا ہے۔