اٹلی نے بےروزگار پاکستانیوں کو بڑی خوشخبری دیدی

اٹلی نے پاکستانی شہریوں کے لیے نوکریوں میں باضابطہ کوٹہ مختص کر کے ایک تاریخی اقدام کیا ہے، جس کے بعد یہ یورپ کا پہلا ملک بن گیا ہے جو پاکستان کو ورک فورس کے لیے ترجیحی کوٹہ دے رہا ہے۔

وزارتِ اوورسیز پاکستانیز کے ترجمان کے مطابق اٹلی نے آئندہ تین سال کے لیے مجموعی طور پر 10,500 نوکریوں کا کوٹہ پاکستان کو فراہم کیا ہے۔

اس منصوبے کے تحت ہر سال 3,500 پاکستانی شہری روزگار کے لیے اٹلی جا سکیں گے، جن میں 1,500 سیزنل اور 2,000 نان سیزنل کوٹہ شامل ہے۔ یہ مواقع شپ بریکنگ، زراعت، ہیلتھ کیئر اور دیگر شعبوں میں دستیاب ہوں گے۔

ترجمان نے بتایا کہ پاکستانی ہنرمند اور نیم ہنرمند افراد کے لیے ویلڈرز، ٹیکنیشنز، شیف، ویٹرز اور ہاؤس کیپنگ کے شعبوں میں ملازمتیں فراہم کی جائیں گی۔

اس کے علاوہ نرسنگ، میڈیکل ٹیکنیشن، فارمنگ اور کاشتکاری جیسے شعبوں میں بھی پاکستانی ورک فورس کے لیے روزگار کے مواقع موجود ہوں گے۔

پاکستان اور اٹلی کے درمیان جوائنٹ ورکنگ گروپ کا دوسرا اجلاس فروری میں اسلام آباد میں منعقد ہوگا، جس میں لیبر تعاون اور روزگار کے مزید مواقع پر بات چیت کی جائے گی۔

وفاقی وزیر برائے اوورسیز پاکستانیز چوہدری سالک حسین نے اس اقدام کو پاکستان کے لیے ایک اہم سنگِ میل قرار دیا اور کہا کہ اس فیصلے سے یورپی مارکیٹ میں پاکستانی محنت کشوں کے لیے نئے دروازے کھلیں گے۔

انہوں نے مزید کہا کہ حکومت ہر ممکن کوشش کر رہی ہے کہ پاکستانی محنت کشوں کو عالمی سطح پر باعزت روزگار کے مواقع فراہم کیے جائیں۔