دشمن پابندیوں کے ذریعے ایران کی ترقی روکنے کی کوشش کر رہے ہیں اور خود کو عوام کا خیر خواہ ظاہر کرتے ہیں: صدر مسعود پزشکیان

ایران کے صدر مسعود پزشکیان نے کہا ہے کہ ایران کی حقیقی طاقت اور دولت اس کے عوام ہیں، جبکہ دشمن ممالک پابندیوں کے ذریعے ایران کی ترقی روکنے کی کوشش کر رہے ہیں، مگر خود کو ایرانی عوام کا خیر خواہ ظاہر کرتے ہیں۔

مہر خبررساں ایجنسی کے مطابق تہران میں ایک عوامی اجتماع سے خطاب کرتے ہوئے صدر پزشکیان نے کہا کہ وہ طاقتیں جو دنیا میں بڑے جرائم اور قتل عام کی ذمہ دار رہی ہیں، آج انسانی حقوق کے دعوے دار بن چکی ہیں، جو ایک کھلا تضاد ہے۔

صدر پزشکیان نے غزہ، لبنان اور فلسطین کی موجودہ صورتحال کا حوالہ دیتے ہوئے کہا کہ وہاں خواتین، بچوں، بزرگوں اور عام شہریوں کو اندھا دھند نشانہ بنایا جا رہا ہے، اور اس کے باوجود حملہ آور انسانی حقوق کی بات کرتے ہیں، جو انتہائی افسوسناک ہے۔

انہوں نے واضح کیا کہ ایران کی طاقت، استحکام اور خوشحالی کا اصل سرچشمہ عوام ہیں، اور تمام حکومتی اداروں کو عوام سے جڑے رہنا چاہیے تاکہ عوامی فلاح و بہبود یقینی بنائی جا سکے۔

صدر پزشکیان نے کہا کہ ان کی سب سے بڑی خواہش یہ ہے کہ ایران باوقار اور سر بلند رہے اور عوام عزت کے ساتھ زندگی گزاریں۔ اس مقصد کے لیے وہ رہبرِ انقلاب کی پالیسیوں کے تحت پوری کوشش کریں گے۔

انہوں نے جامعات میں مکالمے اور آزاد اظہارِ خیال کی ضرورت پر بھی زور دیا اور کہا کہ طلبہ قومی سرمایہ ہیں۔ حکومت کی ذمہ داری ہے کہ وہ عوام کی آواز سنے، ان کے مسائل سمجھے اور عملی اقدامات کے ذریعے انہیں حل کرے۔

آخر میں صدر نے شفافیت پر زور دیتے ہوئے میڈیا اور نگرانی کے اداروں سے کہا کہ وہ حکومتی کارکردگی پر کڑی نظر رکھیں تاکہ عوام کا اعتماد مضبوط ہو اور ملکی استحکام برقرار رہے۔