ایران میں مہنگائی کے خلاف احتجاج، حکومت کا اصلاحی اقدامات اور شرپسندوں کے خلاف کریک ڈاؤن کا اعلان

تہران: ایران میں حالیہ معاشی مشکلات کے باعث ملک کے مختلف شہروں میں احتجاجی مظاہرے دیکھے گئے، جس کے بعد حکومت نے عوام کے جائز مطالبات کے حل اور بد امن عناصر کے خلاف کارروائی کرنے کا اعلان کیا ہے۔

 مظاہرے زیادہ تر محدود اور مقامی نوعیت کے تھے اور قومی سطح پر روزمرہ زندگی معمول کے مطابق جاری رہی۔ حکومتی خدمات، مواصلاتی نظام اور انٹرنیٹ بلا تعطل کام کر رہے ہیں۔

ایرانی حکام نے عوامی خدشات کو جائز قرار دیا اور کہا کہ حکومت معاشی مسائل کے بنیادی اسباب کو حل کرنے کے لیے اقدامات کر رہی ہے۔

انہوں نے واضح کیا کہ پرامن مظاہرین اپنے جائز مطالبات پیش کر رہے ہیں، جبکہ کچھ منظم عناصر نے بدامنی پھیلانے کی کوشش کی، جنہوں نے عوامی نظم و نسق میں خلل ڈالا اور توڑ پھوڑ کی۔

سیکیورٹی اداروں نے متاثرہ علاقوں میں حفاظتی اقدامات بڑھا دیے ہیں تاکہ عوام کی حفاظت یقینی بنائی جا سکے۔ بعض مقامات پر قانون نافذ کرنے والے اداروں اور شرپسند عناصر کے درمیان جھڑپیں بھی رپورٹ ہوئیں، جنہیں حکام ضروری اقدامات قرار دے رہے ہیں۔

ایرانی حکام نے زور دیا کہ وہ احتجاج کرنے والوں کے ساتھ مکالمے اور مشاورت کے ذریعے مسائل کے حل کے لیے پرعزم ہیں، اور پرامن مظاہروں کو بدامنی میں تبدیل کرنے کی کوشش کرنے والوں کے خلاف سخت قانونی کارروائی کی جائے گی۔

علاوہ ازیں حکام نے کہا کہ کچھ بین الاقوامی میڈیا ذرائع چھوٹے مظاہروں کو بڑھا چڑھا کر پورے ملک میں بدامنی کے طور پر پیش کر رہے ہیں، جبکہ حقیقت میں زیادہ تر علاقوں میں زندگی معمول کے مطابق جاری ہے اور حکومت عوامی مسائل کے حل کے لیے کام کر رہی ہے۔