ایران کی طرف میلی آنکھ سے دیکھنے والوں کے ہاتھ کاٹ دیے جائیں گے، ایرانی بری فوج کے سربراہ

تہران: ایرانی بری فوج کے سربراہ میجر جنرل امیر حاتمی نے واضح الفاظ میں خبردار کیا ہے کہ ایران کی جغرافیائی سالمیت، خودمختاری اور سلامتی کے خلاف کسی بھی قسم کی کارروائی کا بھرپور اور فیصلہ کن جواب دیا جائے گا۔

جنرل امیر حاتمی نے آرمی کمانڈ اینڈ اسٹاف یونیورسٹی کے 86 ویں کورس کے طلبہ سے خطاب کرتے ہوئے کہا کہ موجودہ عالمی حالات ایک نئے عالمی نظام کی تشکیل کی کوششوں کا نتیجہ ہیں، جنہوں نے خطے اور دنیا میں عدم استحکام کو جنم دیا ہے۔

انہوں نے کہا کہ مغربی ایشیا میں کئی تاریخی تبدیلیاں عالمی طاقتوں کے منصوبوں کے تحت ہوئیں، جن میں عثمانی سلطنت کا خاتمہ اور اسرائیل کا قیام شامل ہے۔

جنرل حاتمی نے سابق امریکی صدر جو بائیڈن کے اس بیان کا حوالہ دیا کہ اگر اسرائیل موجود نہ ہوتا تو امریکا کو اسے قائم کرنا پڑتا، اور کہا کہ یہی بیان اس بات کا ثبوت ہے کہ امریکا کیوں اسرائیل کی بلا شرط حمایت کرتا ہے، کیونکہ وہ اسے خطے میں اپنے مفادات کے تحفظ کے لیے استعمال کرتا ہے۔

بری فوج کے سربراہ نے کہا کہ ایران کی جغرافیائی حیثیت اور اسلامی انقلاب کے نظریات نے ملک کو غیر معمولی طاقت فراہم کی ہے، اور دشمن انہی صلاحیتوں کو نشانہ بنانے کی کوشش کر رہے ہیں۔

سپریم نیشنل سیکیورٹی کونسل کے رکن کی حیثیت سے گفتگو کرتے ہوئے جنرل حاتمی نے کہا کہ ایران کی اصل قوت عوام اور اسلامی انقلاب کے رہبر ہیں، اور دشمنوں کی دشمنی کا اصل ہدف بھی یہی دو ستون ہیں۔

انہوں نے حالیہ عوامی احتجاج کا ذکر کرتے ہوئے کہا کہ ایرانی قوم نے دانشمندی، صبر اور شعور کا مظاہرہ کیا، شرپسند عناصر سے خود کو الگ رکھا اور امریکا و اسرائیل کے عزائم کا حصہ بننے سے انکار کر دیا، جو قابلِ تحسین ہے۔

جنرل حاتمی نے کہا کہ حالیہ مسلط کردہ 12 روزہ جنگ کے دوران بری فوج، پاسداران انقلاب، سیکیورٹی اداروں اور عوام نے مل کر تاریخی کامیابی حاصل کی، اور اس تجربے سے دشمن کے آئندہ منصوبوں کو سمجھنے میں مدد ملے گی۔

انہوں نے کہا کہ آج ایرانی مسلح افواج کی تیاری ماضی کے مقابلے میں کہیں زیادہ مضبوط ہے اور کسی بھی دشمن کی غلط فہمی کو فوری اور سخت جواب دیا جائے گا۔

خطاب کے اختتام پر جنرل امیر حاتمی نے کہا کہ ایران کے خلاف کسی بھی جارحیت کے سنگین اور دور رس نتائج ہوں گے، اور بری فوج ملک کی آزادی، سالمیت اور نظام کے دفاع کے لیے ہر وقت تیار ہے۔

انہوں نے مزید کہا کہ وہ فخر کے ساتھ خود کو قوم کا سپاہی سمجھتے ہیں اور ملک کے کسی بھی شہری کی حفاظت کے لیے جان قربان کرنے سے بھی دریغ نہیں کریں گے۔