ترکیہ کا پاک–سعودی دفاعی تعاون کا حصہ بننے کا عندیہ

ترکیہ نے پاکستان اور سعودی عرب کے درمیان قائم دفاعی تعاون میں شمولیت کی خواہش ظاہر کر دی ہے، جسے خطے کی اسٹریٹجک سیاست میں ایک اہم پیش رفت قرار دیا جا رہا ہے۔

بین الاقوامی خبر رساں ادارے کے مطابق اگر یہ دفاعی تعاون تین ملکی اتحاد کی شکل اختیار کرتا ہے تو اس کے اثرات صرف مشرقِ وسطیٰ تک محدود نہیں رہیں گے بلکہ اس سے عالمی سطح پر طاقت کے توازن میں بھی نمایاں تبدیلی آ سکتی ہے۔

یاد رہے کہ پاکستان اور سعودی عرب کے درمیان گزشتہ سال ایک مشترکہ دفاعی معاہدہ طے پایا تھا، جس کے تحت دونوں ممالک نے اس اصول پر اتفاق کیا تھا کہ کسی ایک کے خلاف حملہ دونوں کے خلاف حملہ تصور کیا جائے گا۔ اس معاہدے کو نیٹو کے اجتماعی دفاع کے اصول سے مشابہ قرار دیا جاتا ہے، جبکہ ترکیہ پہلے ہی نیٹو اتحاد کا باقاعدہ رکن ہے۔

ذرائع کے مطابق ترکیہ کو اس دفاعی فریم ورک میں شامل کرنے کے لیے پاکستان، سعودی عرب اور ترکیہ کے درمیان مشاورت جاری ہے اور امکان ظاہر کیا جا رہا ہے کہ تینوں ممالک کے درمیان جلد کسی باضابطہ معاہدے تک پیش رفت ہو سکتی ہے۔