بین الاقوامی جریدے کی واشنگٹن میں کامیاب پاکستانی سفارتکاری کی تعریف

بین الاقوامی جریدے دی ڈپلومیٹ نے واشنگٹن میں پاکستان کی کامیاب سفارتکاری کی تعریف کی ہے۔

 جریدے میں شائع رپورٹ کے مطابق پاکستان نے پاک-بھارت تنازع کے دوران اپنی سفارتکاری کے ذریعے علاقائی اور عالمی سطح پر اہم مقام حاصل کیا۔

رپورٹ میں کہا گیا کہ بھارت امریکی ثالثی اور صدارتی دورے سے محروم ہو گیا اور اس پر 50 فیصد امریکی ٹیرف بھی عائد کیا گیا۔

بھارت کے اقدامات سے تعلقات منجمد حالت میں پہنچ گئے۔ اس بحران کو پاکستان نے اپنے فائدے میں بدل دیا۔ پاکستان نے صدر ٹرمپ کے ثالثی کردار کو سراہا اور تعلقات میں توازن پیدا کیا۔

دی ڈپلومیٹ کے مطابق پاک-بھارت کشیدگی کے بعد صدر ٹرمپ نے پاکستانی آرمی چیف کو وائٹ ہاؤس مدعو کیا۔ ستمبر 2025 میں وزیراعظم شہباز شریف اور فیلڈ مارشل عاصم منیر نے بھی وائٹ ہاؤس کا دورہ کیا۔

دورے کے دوران گفتگو صرف سیکیورٹی تک محدود نہ رہی بلکہ تجارت اور سرمایہ کاری کے معاملات تک بھی پھیلی۔ اس سے پاک-امریکا انسداد دہشت گردی تعاون دوبارہ بحال ہوا اور تعلقات کو نئی جان ملی۔

جریدے نے مزید بتایا کہ جولائی 2025 میں پاکستان اور امریکہ کے درمیان ٹیرف میں کمی کے لیے تجارتی معاہدہ طے پایا۔ صدر ٹرمپ نے اعلان کیا کہ امریکہ اور پاکستان مل کر بڑے تیل ذخائر کی ترقی کریں گے۔ دسمبر 2025 میں پاکستان کو ایف16 طیاروں کے اپ گریڈ کے لیے امریکی منظوری بھی حاصل ہوئی۔

دی ڈپلومیٹ کے مطابق جنوری 2026 میں پاکستان نے چین کے ساتھ سفارتی تعلقات کی تجدید پر زور دیا۔ امریکہ نے بی ایل اے اور مجید بریگیڈ کو دہشت گرد تنظیموں کی فہرست میں شامل کیا۔ علاوہ ازیں، بھارت کے ساتھ تجارتی معاہدہ نہ ہونے پر امریکہ نے بھارت پر 50 فیصد ٹیرف عائد کیا۔

رپورٹ میں اس بات پر زور دیا گیا کہ پاکستان نے اپنی سفارتی مہارت سے عالمی تعلقات میں متوازن کردار ادا کیا اور علاقائی معاملات میں مثبت اثر ڈالنے میں کامیاب رہا۔