امریکا ایران جوہری مذاکرات آج عمان میں ہوں گے

امریکا اور ایران کے درمیان اہم مذاکرات آج عمان کے دارالحکومت مسقط میں ہونے جا رہے ہیں۔ ان مذاکرات کو خطے اور عالمی سیاست کے لیے خاص اہمیت حاصل ہے۔ دونوں ممالک کے نمائندے بات چیت کے لیے عمان پہنچ رہے ہیں۔

عرب میڈیا کے مطابق ایران کے وزیر خارجہ عباس عراقچی مذاکرات میں شرکت کے لیے مسقط پہنچ چکے ہیں۔ ایرانی وزارت خارجہ کے ترجمان اسماعیل بقائی نے تصدیق کی ہے کہ عباس عراقچی امریکی حکام کے ساتھ جوہری امور پر بات چیت کریں گے۔ ان کا کہنا ہے کہ ایران ان مذاکرات میں مکمل اختیار کے ساتھ شریک ہو رہا ہے۔

ایرانی حکام کے مطابق بات چیت کا مقصد ایک ایسا معاہدہ حاصل کرنا ہے جو منصفانہ ہو، دونوں فریقین کے لیے قابل قبول ہو اور باوقار مفاہمت پر مبنی ہو۔ ایران نے واضح کیا ہے کہ مذاکرات صرف جوہری معاملات تک محدود رکھے جائیں گے اور کسی دوسرے موضوع کو شامل نہیں کیا جائے گا۔

دوسری جانب امریکی حکام بھی مذاکرات کے لیے عمان روانہ ہو گئے ہیں۔ امریکی وفد میں مشرق وسطیٰ کے لیے خصوصی نمائندہ اسٹیو وٹکوف شامل ہیں، جبکہ صدر ڈونلڈ ٹرمپ کے داماد جیرڈ کشنر بھی وفد کا حصہ ہیں۔ امریکی وفد مذاکرات میں اپنے مؤقف اور شرائط پیش کرے گا۔

واضح رہے کہ ابتدائی طور پر امریکا اور ایران کے درمیان جوہری مذاکرات ترکیہ میں ہونے تھے۔ بعد ازاں ایران کی درخواست پر مقام تبدیل کر کے عمان کر دیا گیا۔ ایران نے یہ مطالبہ بھی کیا تھا کہ مذاکرات میں علاقائی ممالک کو شامل نہ کیا جائے۔ ان مطالبات کے بارے میں تاحال کوئی باضابطہ فیصلہ سامنے نہیں آیا۔