متحدہ عرب امارات کا پاکستانیوں کیلئے ورک ویزے سے متعلق بڑا اعلان

پاکستان میں متحدہ عرب امارات کے سفیر سالم الزابی نے کہا ہے کہ پاکستانی محنت کشوں کے لیے یو اے ای کے ورک ویزے جلد شروع کیے جائیں گے۔ اس حوالے سے ضروری تیاریوں پر کام جاری ہے اور پیش رفت متوقع ہے۔

یہ بات انہوں نے اسلام آباد میں یو اے ای کے سفارت خانے میں پاکستان اوورسیز ایمپلائمنٹ پروموٹرز ایسوسی ایشن کے وفد سے ملاقات کے دوران کہی۔ وفد کی قیادت چیئرمین پوئپا سید رحمت علی شاہ کر رہے تھے۔ ملاقات میں ایسوسی ایشن کے دیگر عہدیداران بھی شریک تھے۔

سفیر سالم الزابی نے وفد کا خیر مقدم کرتے ہوئے کہا کہ پاکستان اور متحدہ عرب امارات کے تعلقات تاریخی اور برادرانہ ہیں۔ دونوں ممالک ایک دوسرے کے ساتھ مختلف شعبوں میں تعاون کر رہے ہیں۔ افرادی قوت کی فراہمی اس تعلق کا اہم حصہ ہے۔ انہوں نے کہا کہ پاکستانی ورکرز نے یو اے ای کی ترقی میں نمایاں کردار ادا کیا ہے۔

انہوں نے پاکستانی ہنر مند افرادی قوت کی تعریف کرتے ہوئے کہا کہ پاکستانی محنت کش اپنی پیشہ ورانہ صلاحیتوں کی وجہ سے یو اے ای میں قدر کی نگاہ سے دیکھے جاتے ہیں۔ تعمیرات، خدمات اور دیگر شعبوں میں پاکستانیوں کی خدمات قابلِ ستائش ہیں۔

یو اے ای کے سفیر نے تصدیق کی کہ پاکستانیوں کے لیے ورک ویزوں کے اجرا کو دوبارہ شروع کرنے کے لیے ہوم ورک جاری ہے۔ جلد اس حوالے سے خوشخبری سامنے آئے گی۔ اس اقدام سے بڑی تعداد میں پاکستانی نوجوانوں کو فائدہ پہنچے گا۔

اس موقع پر چیئرمین پوئپا سید رحمت علی شاہ نے کہا کہ یو اے ای اور پاکستان کے تعلقات مضبوط بنیادوں پر قائم ہیں۔ انہوں نے امید ظاہر کی کہ ورک ویزوں کی بحالی سے دونوں ممالک کے درمیان معاشی تعاون میں مزید اضافہ ہوگا اور پاکستانی افرادی قوت کے لیے بیرون ملک روزگار کے دروازے کھلیں گے۔