ٹرمپ نے اوبامہ اور ان کی اہلیہ کی توہین آمیز ویڈیو شیئر کردی، معافی سے انکار

امریکی صدر ڈونلڈ ٹرمپ ایک بار پھر اپنی سوشل میڈیا سرگرمیوں کی وجہ سے شدید تنقید کی زد میں آ گئے، جب انہوں نے ایک ایسی ویڈیو شیئر کی، جس میں سابق صدر باراک اوباما اور ان کی اہلیہ مشیل اوباما کو بندروں کے روپ میں دکھایا گیا تھا۔ یہ ویڈیو ٹرمپ کے سوشل میڈیا پلیٹ فارم ٹروتھ سوشل پر رات گئے شیئر کی گئی متعدد پوسٹس کا حصہ تھی۔

دوپہر تک یہ ویڈیو ہٹا دی گئی، تاہم اس سے قبل ڈیموکریٹس اور ری پبلکنز دونوں جانب سے اس پر سخت ردِعمل سامنے آیا اور اسے کھلی نسل پرستی قرار دیا گیا۔ ابتدا میں وائٹ ہاؤس نے اس پوسٹ کو “انٹرنیٹ میم” قرار دے کر اس کا دفاع کیا، لیکن بعد ازاں وضاحت دی کہ یہ پوسٹ صدر نے نہیں بلکہ وائٹ ہاؤس کے ایک اہلکار نے غلطی سے شیئر کر دی تھی۔

ایئر فورس ون میں صحافیوں سے گفتگو کرتے ہوئے صدر ٹرمپ نے اس معاملے میں اپنی ذمہ داری سے انکار کیا۔ انہوں نے کہا کہ وہ روزانہ ہزاروں چیزیں دیکھتے ہیں اور انہوں نے اس ویڈیو کا صرف ابتدائی حصہ دیکھا تھا، جس میں 2020 کے صدارتی انتخاب سے متعلق دعوے شامل تھے۔ انہوں نے معافی مانگنے کے مطالبات کو مسترد کرتے ہوئے کہا کہ انہوں نے کوئی غلطی نہیں کی۔

یہ ویڈیو مشرقی امریکی وقت کے مطابق رات 11 بج کر 44 منٹ پر شیئر کی گئی تھی۔ ایک منٹ اور دو سیکنڈ کی اس ویڈیو میں تقریباً 59ویں سیکنڈ پر اوباما جوڑے کی توہین آمیز تصویر شامل کی گئی تھی۔ ویڈیو کا بڑا حصہ 2020 کے صدارتی انتخاب سے متعلق بے بنیاد الزامات پر مبنی تھا، جن میں الیکٹرانک ووٹنگ مشینوں اور انتخابی بے ضابطگیوں کا ذکر کیا گیا تھا۔ صدر ٹرمپ ماضی میں بھی جو بائیڈن کے مقابلے میں اپنی شکست کو تسلیم کرنے سے انکار کرتے رہے ہیں۔

ری پبلکن سینیٹر ٹِم اسکاٹ، جو اس وقت سینیٹ میں واحد سیاہ فام ری پبلکن ہیں، نے سوشل میڈیا پلیٹ فارم ایکس پر لکھا کہ وہ دعا کر رہے ہیں کہ یہ ویڈیو جعلی ہو کیونکہ یہ وائٹ ہاؤس کی جانب سے دیکھی جانے والی سب سے زیادہ نسل پرستانہ چیز ہے۔ انہوں نے صدر سے مطالبہ کیا کہ اس پوسٹ کو ہٹا دیا جائے۔

ری پبلکن رکنِ کانگریس مائیک لاولر نے بھی اس پوسٹ کو حذف کرنے کا مطالبہ کیا اور اسے انتہائی توہین آمیز قرار دیا، خواہ یہ جان بوجھ کر کیا گیا ہو یا غلطی سے۔

ڈیموکریٹس نے اس واقعے کو صدر ٹرمپ کے ماضی کے متنازع بیانات سے جوڑتے ہوئے ری پبلکن قیادت سے اس کی مذمت کرنے کا مطالبہ کیا۔ ایوانِ نمائندگان میں ڈیموکریٹس کے قائد حکیم جیفریز نے کہا کہ باراک اوباما اور مشیل اوباما باصلاحیت، باوقار اور محبِ وطن امریکی ہیں جو اس ملک کی بہترین نمائندگی کرتے ہیں، جبکہ انہوں نے ٹرمپ پر سخت تنقید بھی کی۔