جنگ اور سفارتکاری دونوں آپشن موجود ہیں، فیصلہ امریکا پر ہے کہ وہ کون سا راستہ اختیار کرتا ہے، ایرانی وزیر خارجہ

ایرانی وزیر خارجہ عباس عراقچی کا کہنا ہے کہ جنگ اور سفارتکاری دونوں آپشن موجود ہیں، فیصلہ امریکا پر ہے کہ وہ کون سا راستہ اختیار کرتا ہے۔

ایرانی وزیر خارجہ عباس عراقچی کا کہنا ہے کہ امریکا سے جوہری مذاکرات کا اگلا دور ابھی طے نہیں ہوا، دونوں فریق چاہتے ہیں بات چیت جلد شروع ہو، مذاکرات کا طریقہ کار نہیں، ایجنڈا اور سنجیدگی اہم ہے، عمان میں ہونے والے مذاکرات صرف ایٹمی معاملے تک محدود تھے۔

انہوں نے کہا کہ یورینیم کی افزودگی ایران کا ناقابل تردید حق ہے جسے بمباری سے ختم نہیں کیا جاسکتا، ہمارے پاس جنگ اور سفارتکاری دونوں آپشن موجود ہیں، امریکا نے حملہ کیا تو خطے میں موجود ان کے تمام فوجی اڈے ہمارا نشانہ ہوں گے۔

ایرانی وزیر خارجہ نے کہا کہ امریکا نے حملہ کیا تو پورا خطہ جنگ کی لپیٹ میں آجائے گا، میزائل پروگرام دفاعی معاملہ ہے جس پر کوئی سمجھوتہ نہیں ہوگا، اولین ترجیح جنگ سے بچاؤ اور سفارتی حل ہے، فیصلہ امریکا پر ہے کہ وہ مذاکرات یا جنگ میں سے کون سا راستہ اختیار کرتا ہے۔