آسٹریلیا نے جاسوسی کے الزام میں دو چینی باشندوں کو گرفتار کرلیا

آسٹریلیا کی وفاقی پولیس نے اعلان کیا ہے کہ دو چینی شہریوں پر غیر ملکی مداخلت کے الزام میں فردِ جرم عائد کر دی گئی ہے۔

پولیس کے مطابق ایک 25 سالہ مرد اور ایک 31 سالہ خاتون پر غیر ملکی مداخلت کا الزام لگایا گیا ہے جس کی سزا زیادہ سے زیادہ پندرہ سال قید ہو سکتی ہے۔ یہ دونوں افراد آسٹریلیا کے دارالحکومت کینبرا میں موجود گوان ین سیتا نامی بدھ مت گروہ کی خفیہ نگرانی اور معلومات اکٹھی کرنے میں ملوث تھے۔

پولیس عدالت میں یہ مؤقف اختیار کرے گی کہ یہ دونوں افراد ایک تیسرے چینی شہری کے ساتھ مل کر کام کر رہے تھے، جس پر گزشتہ سال اگست میں اسی نوعیت کے الزامات عائد کیے گئے تھے۔ یہ سرگرمیاں چین کے پبلک سیکیورٹی بیورو کی ہدایات پر کی جا رہی تھیں جو چین کا مرکزی داخلی قانون نافذ کرنے والا ادارہ ہے۔

آسٹریلوی حکام کے مطابق اس کیس کی تحقیقات کا آغاز گزشتہ سال آسٹریلیا کی انٹیلی جنس ایجنسی کی فراہم کردہ اطلاعات پر ہوا۔ ایجنسی کے سربراہ مائیک برگس نے کہا کہ موجودہ سیکیورٹی ماحول نہایت پیچیدہ، چیلنجنگ اور تیزی سے بدل رہا ہے، جہاں متعدد ممالک آسٹریلیا میں رہنے والی ڈائسپورا کمیونٹیز کی نگرانی، ہراسانی اور دباؤ میں ملوث ہیں۔

انہوں نے کہا کہ اس قسم کا رویہ مکمل طور پر ناقابل قبول ہے اور اسے کسی صورت برداشت نہیں کیا جائے گا۔ کینبرا میں موجود چینی سفارت خانے نے اس معاملے پر فوری طور پر کوئی ردعمل نہیں دیا۔

آسٹریلوی حکام کا کہنا ہے کہ وہ اس کیس کو قومی سلامتی کے تناظر میں انتہائی سنجیدگی سے دیکھ رہے ہیں اور غیر ملکی مداخلت کے ایسے واقعات کے خلاف سخت کارروائی جاری رہے گی۔