امریکہ اور ایران جوہری معاہدے پر لچک کا مظاہرہ کر رہے ہیں : ترکیہ کے وزیرِ خارجہ

ترکیہ کے وزیرِ خارجہ ہاکان فیدان نے کہا ہے کہ امریکہ اور ایران جوہری معاہدے کے معاملے پر لچک کا مظاہرہ کر رہے ہیں اور واشنگٹن بظاہر محدود حدود کے اندر ایرانی یورینیم افزودگی کو برداشت کرنے پر آمادہ دکھائی دیتا ہے۔

واشنگٹن اور تہران کے ساتھ رابطوں میں رہنے والے ترک وزیر نے فنانشل ٹائمز کو دیئے گئے انٹرویو میں کہا کہ یہ ایک مثبت پیش رفت ہے کہ امریکی حکام واضح حد بندی کے ساتھ ایرانی افزودگی کو قبول کرنے کے لیے تیار نظر آتے ہیں۔

ان کا کہنا تھا کہ ایرانی قیادت اب یہ تسلیم کر رہی ہے کہ انہیں امریکہ کے ساتھ کسی معاہدے تک پہنچنا ضروری ہے، جبکہ امریکہ بھی یہ سمجھ رہا ہے کہ ایران کی کچھ سرخ لکیریں ہیں جنہیں نظرانداز نہیں کیا جا سکتا۔ ایران پر دباؤ ڈال کر اسے مکمل طور پر پیچھے ہٹنے پر مجبور کرنا بے معنی ہوگا۔

ہاکان فیدان نے بتایا کہ ان کے خیال میں تہران واقعی ایک حقیقی معاہدہ چاہتا ہے اور افزودگی کی سطح پر پابندیوں اور سخت معائنہ نظام کو قبول کر سکتا ہے، جیسا کہ 2015 کے معاہدے میں کیا گیا تھا۔

ترک وزیرِ خارجہ نے خبردار کیا کہ اگر ایران اور امریکہ کے مذاکرات کے دائرہ کار کو بیلسٹک میزائل پروگرام تک وسیع کیا گیا تو اس کا نتیجہ ایک اور جنگ کی صورت میں نکل سکتا ہے۔ امریکی محکمہ خارجہ اور وائٹ ہاؤس نے اس بیان پر کوئی ردعمل نہیں دیا۔