ٹرمپ نے دوران احتجاج چھ ہزار اسٹارلنک سیٹلائٹ انٹرنیٹ ٹرمینلز ایران پہنچائے : رپورٹ

رپورٹس کے مطابق ایران میں ملک گیر احتجاج کے دوران انٹرنیٹ تک رسائی معطل کیے جانے کے بعد سابق امریکی صدر ڈونلڈ ٹرمپ کی ہدایات پر تقریباً چھ ہزار اسٹارلنک سیٹلائٹ انٹرنیٹ ٹرمینلز خفیہ طور پر ایران پہنچائے گئے تاکہ مظاہرین آن لائن رابطہ برقرار رکھ سکیں۔

غیر ملکی میڈیا رپورٹس میں دعویٰ کیا گیا کہ یہ اقدام ایران کی جانب سے انٹرنیٹ بلیک آؤٹ کے ردِعمل میں کیا گیا، جس کا مقصد مظاہرین کو بیرونی دنیا سے رابطے میں رکھنا تھا۔

بتایا جاتا ہے کہ یہ آلات مختلف راستوں سے ایران کے اندر پہنچائے گئے، تاہم اس حوالے سے کسی سرکاری ذریعے نے کھل کر تصدیق نہیں کی اور معاملہ تاحال رپورٹس اور دعوؤں تک محدود ہے۔

رپورٹس میں مزید کہا گیا ہے کہ ایرانی سیکیورٹی فورسز نے ان آلات کی بڑی تعداد کو جلد ہی ضبط کر لیا، جبکہ جو ٹرمینلز استعمال میں آ چکے تھے انہیں مبینہ طور پر روسی ٹیکنالوجی کی مدد سے جام کر دیا گیا۔

اس حوالے سے سامنے آنے والی ایک ویڈیو میں اسٹارلنک کے آلات کے متعدد ڈبے دکھائے گئے ہیں، جو زمین پر قطاروں میں رکھے ہوئے نظر آتے ہیں، کچھ ڈبے کھلے ہوئے ہیں جن میں اینٹینا اور دیگر آلات واضح دکھائی دیتے ہیں۔

ویڈیو کے فریم کے نچلے حصے میں ایرانی سرکاری نشریاتی ادارے اسلامی جمہوریہ ایران براڈکاسٹنگ نیوز کا واٹرمارک بھی نمایاں ہے، جس سے اندازہ ہوتا ہے کہ یہ مناظر ایرانی حکام کی جانب سے ریکارڈ یا جاری کیے گئے۔

ماہرین کا کہنا ہے کہ سیٹلائٹ انٹرنیٹ ٹیکنالوجی روایتی زمینی نیٹ ورکس سے آزاد ہوتی ہے، اسی لیے ایسے حالات میں اسے مکمل طور پر بند کرنا مشکل ہو جاتا ہے، تاہم سگنل جام کرنے اور آلات ضبط کرنے جیسے اقدامات سے اس کی افادیت کم کی جا سکتی ہے۔