ایپسٹین فائلز : انسان اب پیدا نہیں، لیب میں ڈیزائن ہوں گے : ناروے کی شہزادی

ناروے کا شاہی خاندان جو پہلے ہی ایک مقدمے کی وجہ سے دباؤ میں ہے، اب ایک نئی بحث کی لپیٹ میں آ گیا ہے۔ شہزادی میٹے مارِت کی جانب سے جیفری ایپسٹین کو کی گئی ایک ای میل بحران کا سبب بن رہی ہے۔

شہزادی میٹے مارِت نے جیفری ایپسٹین کی گئی ای میل میں لکھا کہ جلد لوگ شاید نئے انسان پیدا نہیں کر سکیں گے، لیکن شاید یہ لا لا لینڈ جیسا ہو جائے گا اور ہم انہیں لیبارٹری میں ڈیزائن کر سکیں گے۔ اس جملے نے سوشل میڈیا پر شدید ردِعمل کو جنم دیا ہے، جہاں ناقدین اسے غیر حساس اور غیر محتاط طرزِ اظہار قرار دے رہے ہیں۔

دستاویزات کے مطابق یہ خط و کتابت نومبر 2012 کی ہے، جس میں صحت، ماحولیات اور بایوٹیکنالوجی سے متعلق مضامین اور لنکس کا تبادلہ ہوا۔ تجزیہ کاروں کا کہنا ہے کہ زبان غیر رسمی اور قیاسی نوعیت کی دکھائی دیتی ہے، اور اس میں کسی سرکاری پالیسی، فنڈنگ یا منظم انسانی تجربات کی ہدایات کا کوئی اشارہ موجود نہیں۔

اسی ماہ کی ایک اور ای میل نے بھی خاصی توجہ حاصل کی ہے۔ اس پیغام میں، جب ماریوس کی عمر 15 برس تھی، میٹے مارِت نے ایپسٹین سے ایک والدین سے متعلق معاملے پر رائے طلب کی۔ پیغام میں ایک جملہ شامل تھاکہ کیا ایک ماں کے لیے یہ نامناسب ہے کہ وہ اپنے 15 سالہ بیٹے کے وال پیپر کے لیے دو برہنہ خواتین کو سرف بورڈ اٹھائے ہوئے تجویز کرے؟ یہ اقتباس، اب آن لائن وسیع پیمانے پر گردش کر رہا ہے۔